Со сярысь иворто "Удмурт кенешлэн" Вконтактэ вотэс бамаз.
Ужрад 21-тӥ тулыспалэ Ижкарысь удмурт театрын ортчоз. Отчы Удмуртиысь но мукет улосвылъёсысь 500 пала мурт пыриськоз. Та нуналэ конференциын трос докладъёс лыдӟозы, адӟытонъёс ужалозы, Кузебай Гердлэн кылбуръёсыз чузъяськозы, конференцилэн кыкетӥ люкетаз спектакль возьматозы.
Со сяна, конференциын Кузебай Герд нимо йӧскалык премиез сётон сӥё-дано ужрад ортчоз. Тодады вайытӥськом, та премилэн лауреатъёсыз луылӥзы Башкортостанысь удмуртъёслэн национально-культурной центренызы кивалтӥсь Ренат Галямшин, Янаул ёросысь удмуртъёслэн азьветлӥсьсы Юрис Саитов. Нош 2020-тӥ арын та ужрад Башкортостанысь Татышлы ёросын ортчиз.