Туннэ, 2-тӥ декабре, Калтасыын ортчись ужрадэ Башкортостанлэн пӧртэм ёросъёсаз улӥсь удмуртъёс вуизы. Люкаськем калыкез пумитаса вераськизы Калтасы ёрос администрациен кивалтӥсь Забир Габдуллин, УР-ысь йӧскалык политикая министр Эдуард Петров но мукетъёс.
- Ми туж шумпотӥськом, таӵе бадӟым праздникез тӥледын ӵош ортчытӥськом шуыса. Бадӟым тау вераме потэ ваньдылы, малы ке шуоно асьмеос огазе кариськыса ужаны кулэ, ӵошен удмуртлыкмес азинтоме, - вераз Эдуард Степанович. - «Дни удмуртской культуры в регионах России с компактным проживанием удмуртов» проект бордын бадӟым команда ужа: Удмуртиысь Йӧскалык политикая министерство, муниципал огазеяськонъёс, УР-ысь Калыкъёслэн эшъяськон юртсы, лулчеберетъя огазеяськонъёс, музейёс, библиотекаос, школаос но отын ужасьёс. Тау кылъёсме вераме потэ Калтасы ёрос администрацилы, Бадӟым Качак гурт поселенилэн администрациезлы, Башкортостанысь удмуртъёслэн национально-культурной центрзылы туннэ таӵе ужрадын пумиськыны луонлык кылдытэмзы понна. Азьланяз но ӵошен мед ужаломы.
Ужрадэз пленарной заседание азьланьтӥз.
Удмурт культурая нуналъёс улсын «Этнокультурное образование: новые вызовы и практики взаимодействия», «Опыт реализации удмуртских молодежных проектов в сфере сохранения языка», «Актуальные проекты в сфере сохранения и развития удмуртского языка и культуры», «Традиционные удмуртские танцы» секциос ужалозы. Пумиськон УР-ысь эктонъя но фольклор кырӟанъёсъя «Айкай» Кун театрлэн концертэныз йылпумъяськоз.