Фестиваль калыкъёслэсь лулчеберетсэс уте

Со арлы быдэ шаерысьтымы пӧртэм калыкъёслэсь эшлыко кусыпъёссэс юнматон, сям-йылолъёсты утён но азинтон понна радъяське.  Татчы башкир, ӟуч, бигер, пор, мордва но мукет ансамбльёс пырисько. Нош удмурт калыклэсь лулчеберетсэ фестивальын Купченеевоысь «Зангари» калык ансамбль возьматэ. Туэ но учкисьёс соосты зол кичабонъёсын данъязы.

Гала-концертэ Башкортостанысь, Татарстанысь но Оренбург улосвылысь 19 коллективъёс потӥзы. Гран-прилэн кузёез луиз Ермекей ёросысь арганчиослэн ансамбльзы. Фестивале пыриськисьёс кырӟам-эктэмзы сяна, калык сиён-юонзэс но возьматӥзы. Татын шумпотыса веръязы удмуртъёслэсь перепечсэс но. «Фестиваль туж шулдыр ортчиз, - вера Башкортостанысь удмуртъёслэн национально-культурной центрзылэн Ермекей ёросъя филиалэныз кивалтӥсь Анастасия Вождаева. – Конкурс бере татын пӧртэм ӵошатсконъёс радъяськизы, «Первушино» пилотажной группа авиашоу возьматӥз, башкир но бигер эстрадаысь кизилиос Айдар но Рустем Губайдуллинъёс кырӟазы».

Туспуктэм: Калык творчествоя республика центр