Башкортостанысь удмуртъёс дорын Эстониысь но Удмуртиысь, МГУ-ысь экспедициос ужало

МГУ-ысь студентъёс  но аспирантъёс (кивалтӥсьсы Егор Кашкин) Татышлы удмуртъёслэсь вераськон кылзэс, грамматиказэс  эскеро.

Ужаны кутскиз кыкетӥез эскерон ужен вырись группа. Француз проектъя эстон-удмурт экспедиция Янаул, Калтасы, Бурай ёросъёсысь удмурт коллективъёсын пумиськоз, интыысь сям-йылолъёсын тодматскоз, видеосъемкаос лэсьтоз. Туннэ экспедицилэн ёзчиосыз Николай Анисимов (Эстон литературной музейысь но РАН-лэн Урал ёзэтысьтыз федерал эскерон центрлэн Историяя, кылъя но литературая удмурт институтысьтыз  научной ужась), Екатерина Софронова («Лудорвай» архитектурно-этнографической музей-заповедникысь научной ужась, Удмуртиысь республиканской музыкальной колледжысь преподаватель), Павел Кутергин (Эстониысь Тарту университетысь этнологияя докторант, Хельсинки университетысь студент) Шудек но Каймашабаш гуртъёсысь «Тюрагай» но «Капчи мылкыд» фольклор коллективъёсын пумиськизы, йылолъёс дыръя кырӟанъёсты гожтӥзы. Экспедициын люкам материалъёс «Обрядовые песни закамских удмуртов» книгае пырозы.