-2 °С
Салкым
Антитеррор
Вань иворъёс
Лулчеберет
3 Июне 2022, 23:55

Гуртэн вӧсьёс ортчизы

Башкортостанысь удмуртъёслэн улоно пӧртэм ёросъёсазы вӧсьёссэс пӧртэм сямен радъяло. Лэсьтон вакытэз но висъяське. Бурай ёросын, кылсярысь, Алтау гуртын улӥсь вӧсясьлэн Анатолий Галихановлэн верамезъя, вӧсе ӟег сюреланы кутскем бере гинэ пото. Янаул ёросын одӥг вӧсьсы ортчиз ни. Нош туннэ, 3-тӥ инвожое, инвожо толэзьлэн нырысетӥ удмуртарняяз, Татышлы ёросысь удмурт гуртъёс Гуртэн вӧсьёссэс ортчытӥзы. Сое ортчытэмъёс, Юг шурлэн бур палаз интыяськем гуртъёс - Выль Татышлы, Вылысь Татышлы, Уразгильды, Вязовка, Юда, Арибаш, Бальзюга, Майск - вуоно удмуртарняе Выль Татышлыын радъяськись Мӧр вӧсе люкаськозы.

Гуртэн вӧсьёс ортчизы
Гуртэн вӧсьёс ортчизы

Уразгильды гуртын вӧсь кырзы шур дуре, Шордин ошмес доры интыяськемын. Татын Гурт вӧсь гинэ ортче. Арлы быдэ Вӧсь азьын гуртысь калык мыло-кыдо Вӧсь кырез утялтыны- сузяны субботнике люкаське. Туэ пиосмуртъёс выль ӝӧк лэсьтӥзы, пу дасязы, турын турназы. Кышномуртъёслы но уж сюриз. Соос ошмеслэсь ӧрзэ тазатӥзы, турнам турынэз утялтӥзы. Вукогуртъёслэн Инмарлы вазиськон инты чебер но ӝикыт луиз.

Вӧсь ортчытон азьын ӝытаз нимысьтыз юнматэм кышномуртъёс, гурт кузя ветлыса, кеньыр но вӧсь дун бичазы. Со кык вӧсьлы тырмыт луыны кулэ. Вазь ӵукнаысен вӧсез радъясь Саляхетдин Нуртдинов, куриськись Ралиф Гараев, гуртысь воргоронъёс Глимхан Исламов, Фанус Султаншин, Константин Байдуллин но мукетъёс лымшор вакытэ ӝук мед вуоз шуыса тыршизы. Вӧсязы пинал ыж. Пиосмуртъёслы юрттӥськизы Лилия Насибуллина, Мадина Нуртдинова, Анна Байдуллина.

Вӧсьлэн радлыкез татын мукет интыосын сярысь пӧртэмгес. Вукогуртъёс сӥзиськон уг лэсьто. Ӝуксы вӧсез радъясьёслэн туннэ ӝог пӧзиз. Вӧсяськон кыре гуртысь гурезетӥ васьконо. Пӧртэм палась каллен оген-кыкен кышномуртъёс  вуылыны кутскизы. Тросэз удмурт калык дӥськутэнызы. «Кытчы гинэ дӥсялод сое. Вӧсе ке ӧд дӥся», - шуэ одӥгез. Гуртэн вӧсьысь ӝукез гурт кузяе уг люко. Ӝук сиытэк кылемед ке ӧз поты, одно ик васьконо вӧсь кыре, яке кинлэсь ке куроно.

Куспазы вераськон, сьӧразы ваем саламзэс ог-огзылы ӵектон сямен дыр вуиз пидесъяськыса, Ралиф Гараевлэсь куриськемзэ кылзыса, аслыд  Инмарлы вазиськыны. Вань курем-сӥзёнъёс мед быдэсмозы. Аминь.

Автор:Анна Байдуллина
Читайте нас: