Куалаен куриськизы Уразгильдыын

Камсьӧръёслэн туннэ тулыс куриськонъёссы но ортчизы. Породэн, выжыен ветлыса-а, асьсэ понна одӥг семьяен-а, ваньзы куриськыса ӝук сиизы, вылысь Инмарез сӥлы каризы.  
Татышлы ёросысь Уразгильды гуртын ортчыто на одӥгзэ куала куриськонэз. Юртъер, кудаз интыяськемын куала, пытсамын ни. Татысь кузё кышно, Ямига Шарапова, улэ Татышлы ёрос центрын нылыз дорын. Быдӟымнал азьын Ямига кенаклэн нылыз но эмеспиез арлы быдэ лыкто анайзылэн дораз, утялтӥсько, дасясько куриськонлы. Куала куриськон тужгес бадӟым но кужмо куриськон лыдъяське вылэм. Ямига Шараповалэн куалаяз Быдӟымналэ тыр нянен но векчи коньдонэн ваньзы сямен та куалае пырисьёс лыктылӥллям. Али арлы быдэ ньыль семьяысь кин ке вуэ. Куриськиз нянен но коньдонэн гуртысь вӧсясь Ралиф Гараев. Вань верам, курем кылъёс кабыл мед луозы.