Туннэ - Поэзилэн нуналэз

Ваньмыз вузаське базарын

Ваньмыз вузаське базарын:
Ческыт улмо, чия, банан.
Чечы но кӧня ке шӧмо,
Мерттэт но уно пол пумо.
Кытысь гинэ ӧвӧл со вуттэмын:
Европа, Бангладеш, Китай...
Кисыосад шальтыртӥсез ке вань,
Вузасьёслы тон - дуно куно но бай.
Выжлёгетэз но валёзы азяд,
Крезьгур шудоз мылкыдыдъя.
Басьты гинэ - ваньмыз тонъя:
Ваньмыз чиля, шудэ но ворекъя.

Ваньмыз вузаське базарын.
Монъя гинэ ӧвӧл вуззы.
Ӧвӧл татын чылкыт яратонзы,
Ӧвӧл шунтӥсь ӵук тылсизы,
Уг вузаськы вулэн вогыриез,
Уг лӧсъяськы зыныз возьлэн.
Коньдон ӧвӧл на дуннеын кузё.
Кузё - инмын, яратонын.
Соин но пыдъёсы бусы доры нуо,
Нош синъёсы вылэ - инме -учко. 

Тубатъёс 

Нырысетӥ радын - яратон.
Тужгес гажаноез куно.
Со ке артэ - шудэ улон
Вуюисьлэн буёлэныз.
Со ке вӧзын - уже пӧзе,
Уг сьӧлтасько пыдъёс музэ.
Со ке сюлмын - кылъёс бурдо,
Уг кышка урдэскам висён.
Артэ соин пуке оскон.
Ӧте выль инвисъёс доры.
Сюсьтыл кадь гомаса уйин,
Уг лэзьы кысыны.
Гажан сылэ тубат вылам,
Соин артэ йӧно ачим.
Вӧзысь котькуд адямилы
Сюлмысь кылъёс шедьто соин.
Тодэ ваёнъёсы чурен
Тодам лыкто вӧсяськыкум.
Эн курлалэ вӧсь каремлы,
Дуно мынам бӧлякъёсы.
Таиз но тубатэ вылын -
Инлы матэ интыямын.
Медаз пуке тубат вылам
Жоб супыльтон но вожъяськон.
Ӟечгес луоз, асме монэ
Дӥсез сямен миськыкузы.
Сьӧлык уг басьты мурт понна.
Аслым сое мед карозы.
Люза БАДРЕТДИНОВА. 

Шушыос 

Вайёс вылын горд шушыос
Горд улмоос кадь адӟисько.
Кыӵе чебер, мусо соос,
Вешалляно кадь потӥсько.
Сиён сётӥ ке, оло ке,
Соос матам но лыктозы.
Кыӵе киям возем потэ,
Пельпум вылам мед пуксёзы.
Вайёс вылысь вайёс вылэ
Тэтчало шушыосы.
Сюлмы сыӵе лычсузьылэ, -
Я, сиське ни, мусоосы.
Вайёс вылын - шушыосы,
Горд улмоос кадь гадьёссы... 

Синмаськон 

Синмаськон вань уга,
Синмаськон!
Котырысь лудъёслы,
Сяськалы...
Горд кисьмам эмезьлы,
Веттаськись ю шеплы,
Вылӥысь, лыз инмысь,
Тюрагай куаралы,
Сиоссэ жалятэк
Горд пиштӥсь шундылы,
Азвесь дун вуэныз
Жильыртӥсь ошмеслы,
Туж мусо жонгетӥсь,
Ческыт му*, ӵуж укто**
Бичаллясь мушъёслы
Синмаськон!
Уката но уга
Гольык пыд бызьылэм
Чебер вож возьёслы,
Гадь тырам шокчылэм
Чиль чылкыт омырлы...
Даурысь дауре
Ваче ки возиськем,
Аслэсьтыз выжызэ,
Йылолзэ, Инмарзэ
Утьыны быгатэм
Вашкала калыклы
Вунонтэм синмаськымон!
Синмаськымон!
Данъяськымон!
Яратон!
Шумпотон!
Со одӥг герӟетын
Даурлы думемын!
Мон соин данъясько
Вордӥськем шаерме,
Сюлмысьтым гажасько
Вань удмурт калыкме!
*Му - чечы.
**Укто - перга.
Ада ДИЕВА. 

Туспуктэм: усьтэм источник