Рязань городын Россиысь фольклористъёслэн V-тӥ конгрессы ортче

Фольклористъёслэн быдэсросси конгрессы - бадӟым тодос форум. Со ньыл арлы огпол ортче но калык лулчеберетэз эскерись валтӥсь тодосчиосты, фольклористъёсты но практикъёсты огазея. Туэ научной форуме пырисько Россилэн 42 регионъёсысьтыз но кунгож сьӧрысь 18 странаосысь тодосчиос, преподавательёс но аспирантъёс. Куд-ог докладчикъёс онлайн режимен ужало. Радъямын вить секциос но дискуссионной площадка. Конгрессэ пырисько удмурт тодосчиос но удмуртъёсты эскерисьёс. Куд-ог докладъёс сӥземын камсьӧр удмуртъёслэн лулчеберетсылы. Кылсярысь, Уфаысь удмурт тодосчи Ранус Садиков но Австриын ужась Татьяна Миннияхметова онлайн амалэн "Фольклор закамских удмуртов: актуальные вопросы сохранения
и изучения" доклад лыдӟизы. "Молитва или заклинание? Размышления об удмуртских куриськонах" эскероназ Эстониысь но Франциысь тодосчи Ева Тулуз но камсьӧр удмуртъёслэсь куриськон нергезэс возьматэ. 

Ӵуказе конгресслэн берпуметӥ нуналэз.

Туспуктэм: https://ryazpressa.ru/v-vserossijskij-kongress-folkloristov-v-ryazani-obedinil-uchastnikov-iz-42-regionov-rossii-i-18-zarubezhnyh-stran/