Уфаын «Многоликая Россия» адӟытон ужа

Адӟытон Башкортостанысь пӧртэм калыкъёслэсь культуразэс, соослэсь аспӧртэмлыксэс, узырлыксэс возьматыны юрттэ. Экспонатъёсты республикаысьтымы Калыкъёслэн эшъяськон юртсылэн филиалъёсыз – историяя но культурая центръёс дасяло. 

- Адӟытонэз Башкортостанысь удмуртъёслэн но поръёслэн историяя но культурая центръёссы дасязы, - вера Башкортостанысь удмуртъёслэн историяя но культурая центрысьтызы валтӥсь ӧнерчи Ирина Самигулова. – Республикаысь калыкъёслэн лулчеберетэнызы тодматскон вылысь музейын экскурсиос радъясько. Татын удмуртъёслэн историяя но культурая центрзылэн экспозициосыныз но Татышлы ёросысь Улысь Балтачысь усточилэн, кызьпу туйен лэсьтӥськисьлэн Алексей Шагиевлэн ужъёсыныз тодматскыны луэ. Финн-угор калыкъёслы сӥзем адӟытон 10-тӥ южтолэзёзь радъяськоз.