«Танып кузяын тӧдьы сяська,тӧдьы сяська но дымбылюк…»

Алтын зундэс, азвесь зундэс,

Байёс киын луэ со.

Сьӧд тӧри вал, кырен кашка

Байёс киын луэ со.

***

Танып дуртӥ туж эн ветлэ,

Бамады чипей ву пазьгоз.
Пиналысен куйык эн басьтэ,

Пинал сюлэмдэс вир басьтоз.

***

Милям валмы, бадӟым валмы

Камыш сиыса ветлэ, дыр.

Солдат луымтэ абзикаймы

Салдат луыса ветлэ, дыр.

***

Кияд понэм зундэсэдлэсь

Йырзэ чигытэк уг кельты.

Пиед чебер, ачим задор,

Йырзэ берыктытэк уг кельты.

***

Алтын дрожка, пар вал кытки,

Кельтӥ ӟалэ сынаса.

Чаль, туганъёс, сайрашоме,

Гымыр мынэ ортчыса.

***

Милям кыткем валъёсмылэн

Тэльбугоез сюмыс, дыр.

Верась калык мед вералоз,

Милям улон шонер, дыр.

***

Аткай етӥн кизем, дыр,

Тысьсэ сиё шуэм, дыр.

Уно ныл-бала вордыса,

Ӟечсэ адӟо шуэм, дыр.

***

Тӧдьы ӟазег малы тӧдьы,

Азвесь вуын пыласькем.

Удмурт нылъёс малы чылкыт,
Ӵук лысву но миськемысь.

***

Алма бакчае пырыса,
Кызьы сиытэк потод.
Тӥ туган доры лыктыса,

Кызьы кырӟатэк потод.

Мадиян Галиханова, 72 арес.

 

Ми озьы ӧй вал туган,

Ми тазьы ӧй вал туган.

Инмысь васькем ваёбыж кадь

Сайрашом вал ми туган.

***

Озьы шуымтэе вал,
Тазьы шуымтэе вал.

Пинал гымыр, чагыр сяська,

Ортчоз шуымтэе вал.

***

Ай ортче ведь, ортче ведь

Шулдыр гужем ортче ведь.

Шулдыр гужем нош ик вуоз,

Пинал даур ортче ведь.

***

Ал луоме асьмеос,
Гуль луоме асьмеос.

Асьме гымырмы ортчытозь

Валче улом асьмеос.

***

Ӝужыт вылэм гурезьды,

Пумит усе лымыды.

Ми лыктӥм но куно луим,

Иньдэ асьтэос мыноды.

Сулубей Шенгараева, 67 арес.

 

Танып но кузяын вож-вож сутэр,

Ӵукна усем лысвуэн кисьмалоз.

Татчы но лыктэм куноосыз
Куно сиёнэн кисьмалоз.

***

Туала турымез мон ӧй турна

Намер пудкайез жаляса.

Сакрае потыса, ог куй кырӟай,

Ортчем гымыръёсме жаляса.

***

Танып но кузяын вож-вож сутэр,

Оген-оген кисьмалоз.

Чалелэ сиёме-юоме,

Оген-оген бичалоз сьӧд сюймы.

***

Алтау музъем, лапег музъем,

Азвесь куко турым ӝужалоз.

Мон ке но кулӥ, нимы кылёз,

Арсын огпол нылпие вералоз.

***

Укно дурысь гыльёсылэн

Сяськаосыз чуж быгай.

Бертоз дыр шуыса возьмай,

Кулэмъёсыз зэм быгай.

***

Ваёбыжэсь пиоссэ кутӥды ке,

Йырзэ вӧйын вӧяса лэзелэ.

Дорады но бертыса юасьёслы

Зэр сектазы шуэыса вералэ.

***

Чуж дэреме чуж али,

Итэтъёсыз сьӧод али.

Кырӟам ӧвӧл, бӧрдод али,

Ӟатэ потыса адӟы али.

***

Солдат пыӵал, корт пыӵал

Пельпумкайме жадьытэ.

Пичиысен атайтэк кыли,

Кырӟатэ но бӧрдытэ.

***

Та урамез кин волятэм

Дагаё вал волятэм.

Дагаё вал волятымтэ,

Мискин солдат волятэм.

***

Куэм но дэремкайме

Куэм, дыр, аныкае.

Секыт кылъёс но верай, дыр,

Бакиль лу, аныкае.

***

Уробое пуксимы но

Валлы секыт луимы.

Секыт аръёсы вордӥськимы,

Шудтэм нылпи луимы.

Гыльдимыш Фаизова.

 

Сюан гуръёс

Шунды но бамын боры сяська

Сое басьтыса кошке муш мумы.

Азбарез ӟамны, коркаез ӟамны,

Сое куштыса кошке ныл нуны.

***

Чиль-чиль но виясь ай вуостэ

Ог азвесь но куштыса дугдытӥ.

Уг мыны но шуись ныл баладэ

Ог кыл гинэ вераса берыктӥ.

***

Азбар шорад умортоед,

Уз палды-а шуид, кыдокай?

Суй вылад будэтэм ныл балаед

Уз кошкы ай шуид-а, тӥклачи?

***

Туэ но куазьёс ай сэзь вылэм,

Тӧр укноосты пась вылэм.

Асьтэос носюан сектаськоды,

Васькалиосты но сазь вылэм.

***

Емыш но пушкын ай емыш вань,

Пинь долкатӥсь сутэр вань.

Шыд-нянь но пушкын ай шыд-нянь вань,

Кисьматыса нулдӥсь вина вань.

***

Ваёбыжлэн ай нылпиез

Алма пуэ донгиське.

Калык анкай шуыку

Мынам сюлмам донгиське.

***

Бакчаям потӥ, кайран кыли,

Мак сяськае ӧвӧл ни.

Дорам пыри, кайран кыли,
Аныкае ӧвӧл ни.

***

Будыкумы ми будӥмы

Бадьлэн выжыосыз кадь.

Будӥмы но таралӥмы

Тылобурдо пиос кадь.

***

Тополь садлы эн синмаське,

Тополь сяська уг потты.

Тополь сяська уг потты но,

Отын уӵы уг чирды.

***

Кытын мынам сьӧд кышетэ,

Ӧвӧл мынам син азям.

Кытын мынам туганъёсы,

Ӧвӧл мынам син азям.

***

Бызи, туби кызьпу йылэ

Кызьпу куарез лыдӟыны.

Дас чиньыям дас зундэсэ,

Кӧшкемакым лыдӟыны.

***

Посылкалы эн синмаськы,

Посылка со синкыли.

Арганчилы эн синмаськы,

Арганчи со алданчи.

***

Пашпулэн мульыез малы ческыт,

Сузьтӥськыса бичамысь.

Кыдёкысь туганъёс малы мусо,

Кӧшкемаса гинэ адӟемысь.

***

Озьы но ортче гымыр,
Тазьы но ортче гымыр.
Каллен гинэ тодытытэк

Ортче на пинал гымыр.
***

Туганъёс тӥ лыктӥды,

Ӟечъяськыны тодӥды.

Маклэн ал сяськаосыз кадь

Син азям адӟиськиды.

***

Анкай, шыдэд ке пӧзиз

Нылпиосыд люкаськоз.

Соку дыръя мон ке ӧй лу,

Синкылиосыд виялоз.

***

Писпу пӧлын писпу данак,

Кызьпу кадь тӧдез ӧвӧл.

Калык пӧлын калык данак,

Мон кадь шудтэмез ӧвӧл.

***

Жӧк вылад но пуктэм самоваред

Чажласа но гурласа мед улоз.

Татчы лыктэм куноосыд

Кырӟаса но гурласа мед улозы.

***

Туганэз доры туганэз лыктоз,

Адӟоз меда сое лулыз кадь.

Адӟиз ке адӟоз ай лулыз кадь,

Медаз адӟы сое ӟатэз кадь.

Пардали Саяпова.

 

Укно дурысен укно дуре

Кӧчырисько гулъёсме.

Кызьы ортчытом меда

Азьлапал нуналъёсме?

***

Танып кузяын тӧдьы сяська,

Тӧдьы сяська но дымбылюк.

Муртлэсь малпамзэ мурт уг тоды,

Аслам сюлмам туж секыт.

***

Уӵы чирдэ шуиськоды,

Кику силе ӧвӧл-а?

Нунал ортче шуиськоды,

Улон ортче ӧвӧл-а?

***

Усьты, анкай, укнодэ,

Гуль сяськаед мед вырӟоз.

Эн бӧрды, аныкае,

Ми ум кошке, кин кошкоз?

***

Анкай, сяська ке бичад,

Кикиёсад эн куасьты.

Вӧзад нылпиед ке вань,

Монэ но эн вунэты.

Ш. Исламшина

 

Кыӵе потэ, кыӵе потэ

Эмезен чай юэме.

Кыӵе потэ, кыӵе потэ

Ас нылпиме адӟеме.

***

Милям урам кык урам,

Огез телефон урам.

Кӧшкемакум, нылпиосы,

Шуккелэ телегырамм.

 

Мадиськонъёс

Одӥг шырлэн кык быжыз.

Гидысен корказёзь нимыз одӥг.

Вить вынъёс корка вуто.

Корка вылын пал куас.

Ачиз пичи  ке но, адямиез бордытэ.

Пичи Петька вень вуза.

 

Солдатэз келян гур

Бадь лёгыса, бадь выртыса,

Кырӟало ӵуж уӵыос.

Кырӟам ӧвӧл, бӧрдоз али

Нужна адӟем калыкъёс.

***

Ми кошкиськом яр ултӥ,

Кышет тӧласа кыле.

Анкай, аткай бӧрдыса кыле,

Корка шораз бергаса.

***

Танып кузя туж кезьыт,

Вай, атыкай, шубадэ.

Оло бертӥськом, оло ум,

Вай, аныкай, бур кидэ.

***

Танып вия, Танып вия,

Камышъёссэ кельтыса.

Камыш ӧвӧл, эшъёс кылё,

Лёгам музъеме кыле.

Лидия Самойлова