Кинъёс со пӧртмаськисьёс?

Камсьӧр удмуртъёслэсь коркась корка пӧртмаськыса ветлонзы тросаз ёросъёсын ышиз-быриз, вунӥз. Яке вань интыосын сыӵе сям-йылол ӧй вал но? Аслам пичи дырысьтым огпол гинэ дорамы кӧшкемыт дӥсяськем пӧртмаськисьёслэсь яке маскаръяськисьёслэсь пыремзэс тодӥсько на. Мон соослэсь йӧспӧртэм дӥсяськемзэс но зол кышкамме гинэ тодӥсько на. Со вал вуж арысь Выль аре потон уйе. 

Бурай ёросысь Алтау гуртын та йылолэз егитъёс ортчытӥллям. Ӝыт шудонэ потыса, ӵош люкаськыса, вылазы берыктэм шубаос яке мукет вужмем дӥськут дӥсяса,ымнырзэс шумен буяса яке маска поныса, коркась корка ветло вылэм. Пӧртмаськыса ветлыны егитъёс ӧвӧл ни, соин та йылолэз ортчытыны туэ гуртысь культура учреждениосын ужасьёс потӥзы. Вера Алтай гуртысь библиотекаын ужась Марина Гафутдинова: «Туэ пӧртмаськыса ветлӥм. Шулдыръяським, кырӟанъёс но кырӟам. Кин пыртэ дораз, кин ӧссэ уг усьты. Корказязы ю тысь пазямы. Корка кузёослы бай мед улозы, арзы умой мед орчоз шуыса сӥзимы». Та ёросысь ик Касиярово гуртын пӧртмаськыса ветло вылэм Вуж Выль ар дыръя. Сое тодаз вае та гуртын будэм удмурт тодосчи-историк Ранус Садиков. Солэн верамезъя, туала вакытэ та гуртын корка пырыны быгатозы бамъёссэс чулкиен ворсам, нылкышно дӥськутъёсын пиосмуртъёс, солдат дӥськутэн кышномуртъёс – пӧртмаськыса ветлӥсьёс. Кузёос пӧртмаськисьёсты сектаса лэзё, доразы пыремъёсты тодманы тыршо, пӧртмаськисьёс асьсэды тодматыны уг дырто, бамзэс усьтыны ке выро, пегӟо.

Вашкалаысен лыктэм йылолъёсты утись но азинтӥсьёс кемагес мед луозы на вал. Ас синмыныд адӟымтэ, отысь-татысь кылэм яке лыдӟем сярысь гожтыны но секыт.

Туспуктэмъёс Ирина Шарафутдиновалэн вконтакте вотэс бамысьтыз басьтэмын.