Калтасы ёросысь Бадӟым Туганеево гуртын "Трезвое село-2021" проект улсын "Ӟазег ишкон" праздник ортчиз

Кузёос 30 ӟазегзэс ишкыны, пушсэ поттылыны, миськылыны, уж вискын шулдыръяськыны, ужзы бырем бере сиыны-юыны 11 кышномуртъёсты ӧтизы.

Тугыниос ӟазег ишкон вемеязы арганчиез но ӧтиллям. Соин удмурт но бигер кырӟанъёс улсы ужзы шулдыр но ӝог мынӥз, дыр.

«Миськоно ӟазегъёсты карнанъёсы ошылыса, гурт пумысь прудэ нуим. Отын но кырӟаса, эктыса ужам. Доре одӥг пӧрась кельтӥм. Урамез шулдыртыса, мынон-бертон сюрес вылын но кырӟам. Бертытозь ӟазег сӥлен ӝук пӧзем вал ини. Ӝӧк сьӧрын нош кырӟаса пуким», - вемеез сярысь вера ачиз кузё кышно Ольга Диязова.