Выль книгаын - камсьӧр удмуртъёс сярысь материал

Серафима Христофоровна Лебедева - музейын ужась, этнограф, зэмос полевик. Удмуртъёслэн улэм интыосазы вуылымтэ интыез кылиз меда солэн? Та изданиез пумозяз лыдӟыса, та юанлы валэктон шедьтыны луэ, дыр. Со нимаське "Полевые заметки музейного этнографа", 2021 г.

Серафима Христофоровналэн умоесь кусыпъёсыз вал Эстониысь национальной музейен но соин кема аръёс кивалтэм директореныз Алексей Петерсонэн. Удмурт-эстон ӵош ужан, кудӥз кутскиз 1971-тӥ арын Эстон национальной музейысь ужасьлэн Калью Консинлэн командировкае вуэменыз, 1977 арысен удмуртъёсты котыр ласянь эскерон этногарфической экспедициослы пӧрмиз. Отчы музейын ужасьёс, туспуктӥсьёс, суредасьёс, удмурт но эстон студентъёс, УдГУ-ысь но УдНИИ-ысь тодосчиос пыриськизы. XX-тӥ даурлэн берпумети кызь вить аръёсаз Эстон но Удмурт национальной музейёс 20 пала валче экспедициос радъязы.

Тодам на анаелэн одӥгез сыӵе экспедиция, музейын ужасьёслэн дорамы пырамзы сярысь верамез. Тӧдьы тушо пиосмуртлы (Алексей Петерсон ӵапак сыӵе тушен ветлэ вылэм -А.Б.) анае кӧня ке экспонатъёс вузаса лэзем. Али вакытэ соосты нокинлы но ӧй сётысал, дыр. Но соос зэмен ик Эстон национальной музейын утисько, мон соосты ас синмыным адӟи но кутылӥ.
Книгаын - этнографлэн Серафима Лебедевалэн экспедициосын гожъямъёсыз. Пыртэмын башкир удмуртъёс сярысь материал но. Оло, туспуктэмъёсысь кин ке асьсэлэсь ӵыжы-выжыоссэс тодмалоз.