Куать нылъёс – куать чеберайёс

Татышлы ёросысь Улысь Балтачысь школаын витетӥ классысь нылъёс понна «Чеберина» конкурс радъяськиз. Отын куать нылъёс «нюръяськизы». Ужрадлэн валтӥсь ужпумез луиз калык лулчеберетэн тодматскон, сям-йылолъёсты азинтон но вордскем кылэз дышетон, утён.

Конкурсэ нылъёс удмурт калык дӥськутэн вуизы. Соосты пӧртэм эскеронъёс витизы. Юанъёс удмурт калык культураен герӟаськемын вал. Конкурсэ пыриськисьёс удмурт сямен чебер, вольыт вераськыны быгатэмзэс возьматӥзы, йӧскалык сиён-юонъёс, калык дӥськутъёслэн люкетъёссы сярысь тодэмзэс веразы, «Ӝогверанъёс» конкурсэ пыриськизы.

Нылъёслэсь быгатонлыкъёссэс дунъязы пиос - жюриын луизы 5-тӥ классысь пиос. Конкурслэн йылпумъянъёсызъя, котькудӥз чеберай номинациын вормисьлэн дипломезлы кузё луиз.

Фото: МБОУ СОШ с. Нижнебалтачево