Удмурт кылэз данъязы

Калтасы ёросысь Краснохолмскийысь кыкетӥ номеро школаын «Здравствуй, здравствуй, сказка» республика конкурслэн муниципал этапез ортчиз. Пӧртэм кылын выжыкыл веранъя вожвылъяськонэ кызьлэсь ятыр ёросысь школаосын дышетскись нылпиос пыриськизы.

Котькуд ар сямен, туэ но конкурсын удмурт калык выжыкылъёс чузъяськизы. Бадӟым Качакысь но Краснохолмскийысь кыкетӥ номеро школаын дышетскисьёс анай кылзэс тодэмзэс но сое гажамзэс возьматӥзы. Котькуд вожвылъяськонын аслаз вормисьёсыз луэ. «Здравствуй, здравствуй, сказка» конкурсын но кужмоосыз шараяськизы. Озьыен, удмурт кылъя выжыкыл верасьёс пӧлын куинетӥ интыез Бадӟым Качакысь Анастасия Зайнакаева басьтӥз, Краснохолмскийысь кыкетӥ номеро школаын дышетскись Кирилл Ильбаев кыкетӥ интые потӥз, нош со школаысь ик Виктория Гафутдинова нырысетӥ интылы кузё луиз. Кыкетӥ классын дышетскись удмурт нылаш анай кылзэ табере Уфаын данъялоз.