Башкортостанысь делегация вань удмуртъёслэн ӧтчамазы пыриськиз

Отчы шаермылэн пӧртэм сэрегъёсысьтыз делегациос вуизы. Съездлэн ужаз Башкортостанысь удмуртъёс но пыриськизы. Республикаысьтымы удмуртъёслэн национально-культурной центрзылэн Янаул ёросысь филиалэныз кивалтӥсьлэн Ю. С. Саитовлэн верамезъя,съездын бадӟым саклык висъяськиз удмурт кылэз дышетонлы, сое семьяосын утёнлы. Юрис Саитович ужрадын «Удмурт Кенешлэн» кивалтӥсезлы Т. В. Ишматовалы Башкортостанысь Калыкъёслэн ассамблеязылэсь тау каронзэ но синпель кузьым сётӥз. «Тӥ монэ весь фотоаппаратэн ветлэ шуиськоды.Туннэ тӥледлы аръёс ӵоже люкаськам туспуктэмъёсме огазеяса кузьмасько. Ӵошен ужам аръёс котьку тӥляд тодады мед луоз». Съездын "Удмурт Кенеш" огазеяськонлы выль тӧрое бырйизы. Табере вань удмуртъёсты азьлане нуоз Кун Кенешысь лулчеберетъя, туризмъя но йӧскалык политикая ялан ужась комиссилэн кивалтӥсез Андрей Ураськин.