Уж дурын пӧсялод – калык пӧлын дано луод

Янаул ёросысь «Победа» ООО-ын тыршыса ужасьёс ӧжыт ӧвӧл. Соос пӧлын – Шудек гуртысь водитель Ильдар Чалгубаев. Кивалтэт солэн ужезлы вылӥ дунъет сётэ, ужез гажамзэ пусъе. Ильдар Кабировичлэн таукаронъёсыз, грамотаосыз шыкысаз трос люкаськемын ни. Кылем арын солы «Башкортостан Республикаысь гурт удысысь сӥё-дано ужась» ним сётӥзы.

Аслыз ӧнер быръемез сярысь юанлы Ильдар Кабирович пальпотыса вакчияк шуиз:

- Школаысен бусыын. Дышетсконме 1991-тӥ арын йылпумъяй.

Уж сюрессэ гурт удысэн герӟан сярысь малпанэз солэн пичи дыръяз ик кылдэм. Уго агрономын ужась атаез Кабир Шаринович сое ӵемысь сьӧраз басьтэ вылэм. Бусыосты соос ӵош котыръяллям. Соослы татысь котькуд гопез, лёгез тодмо. Атаен пиос сюлмынызы но, лулынызы но музъем уж борды биниськемын, шуыны луоз. Вераны кулэ, Кабир Шаринович но «БР-ысь гурт удысысь сӥё-дано ужась» нимлэн кузёез луэ. Туннэ со шумпотэ, пиезлы пичиысен ужез гажан мылкыд пыӵатэмез юнме ӧз луы шуыса. Пиез вордскем шаерзэ мукетызлы ӧз вӧшты, музъем ужез бырйыса, дано нимлы кузё луиз.

Ильдар Кабировичлэн служба аръёсыз Одинцовоын ортчиллям, со ракетной войскоосын луэм. Отын но солы руль сьӧрын пуконэз оскиллям. Армия бере И. Чалгубаев гуртысьтызы «Победа» хозяйствое ужаны потэм. Нырысь УАЗ машинаен ужам, атаезлэн водителез вылэм. Ньыль арскын, 1997-тӥ арын, егит пи КамАЗ-э пуксем. Со дырысен корт эшеныз ноку люкиськымтэ ни.

(Быдэсак лыдӟе газетысь).