Сабантуйын удмурт калыкез данъязы

Та нуналэ бусы ужъёсын учкымон тыршисьёсты данъязы. Шумпотыса верано, сцена вылысен удмуртъёслэн но нимъёссы одӥг пол гинэ ӧз чузъяське. Кылсярысь, «Победа» ООО-ын ужасьёсты Михаил Давлетхановез, Алина Нигаматзяноваез, Юрий но Артём Шакирзяновъёсты Башкортостан Республикаысь Гурт хозяйствоя министерстволэн данъян грамотаеныз пусйизы.

Со сяна, Сабантуйын тылпу кысӥсьёс но ас удысазы быгатонлыкъёссэс возьматӥзы. Конкурслэн йылпумъянъёсызъя, Бадӟым Качакысь Виталий Минликаевлэн но Андрей Хузяхметовлэн командазы нырысетӥ интые потӥз.

Спорт ӵошатсконъёсын но удмуртъёс учкымон луизы. Волейболэн шудонын Бадӟым Качакысь школаын дышетскисьёслэн но студентъёслэн огъя командазы кыкетӥ интые потӥз. Нош бызьыса кузьдалае тэтчанын Валерий Галиахметовлэсь но Светлана Тимиршиналэсь кужмоез ӧз луы.

Озьы ик «Гырон быдтон» праздникын удмурт юрт пуктэмын вал. Отын Бадӟым Качакысь но Бадӟым Туганеевоысь культура удысын тыршисьёс куноосты калыкмылэн лулчеберетэныз, сям-йылолъёсыныз но сиён-юонъёсыныз тодматӥзы.

Озьыен, удмурт калык понна праздник удалтӥз. Куазь но шулдыр мылкыд кузьмаз. Ужась калык малысь-кыдысь шутэтскиз, вуоно ужъёслы кужым люказ.