Башкириын кематэк бусы ужъёс кутскозы

Со сярысь БР-ысь правительстволэн оперативной совещанияз ивортӥз вице-премьер – регионысь гурт хозяйствоя министр Ильшат Фазрахманов. «Толйись тысё культураос (чабей, тритикале, ӟег) огъя 390 сюрс гектарлэсь трос киземын. Солэн 95 процентэз ӟеч возиськемын, нош вить процентсэ – 18 сюрс гектарез – выльысь кизёно луоз. Со ужлы трос дыр кулэ уз луы», - вераз И. Фазрахманов.

Республикаын валэс тысё культураосты огъя 1,365 млн гектаре кизьыны чакламын. Кылем арен ӵошатыса, со 6,8 поцентлы ӧжытгес. Сакыр кушманэз 51 сюрс гектаре кизёзы, 430 сюрс га музъемын будозы кумбагыш, етӥн но рыжик, 44,4 сюрс гектарын – картофка, укмыс сюрс гектарын – кешыр, кубиста но мукет бакча сиёнъёс.

- Хозяйствоос кидыс дасян сярысь дыраз сюлмаськизы, - вераз вице-премьер. – Кизён ужъёслы дасям 284 сюрс тонна ю тысь – асьмелэн. Со пӧлысь 38,5 сюрс тоннаез – элита но суперэлита. Тросаз хозяйствоосын удобрение тырмыт басьтэмын.

Фото:минсельхоз РБ