Газетлэн вуоноез лыдӟисьёс бордын

Туннэ, 3-тӥ декабре, уж сюресмы Янаул ёросысь Шудеке вуттӥз. Гуртысь культура юртэ «Оптимист» клубе ветлӥсьёс люкаськизы. Пумиськонэ Шудек гурт поселенилэн администрациеныз кивалтӥсь Валерий Гарипов, школаысь удмурт кылъя дышетӥсь Инзиля Минликаева, культура юртын ужасьёс Ангелина Менгафарова но Людмила Давлетшина, библиотекарь Людмила Садыкова, гуртлэн улоназ азинлыко пыриськисьёс вуизы. Пумиськонмылэн валтӥсь мугез луиз «Ошмес» газетлы гожтӥськонэз радъян. Вераны кулэ, берло дыре печатной изданиослэн тиражзы кулэсме.

Тулыс гожтӥськон кампания вакытэ редакцимы «Кузьмасько газет» акция ялӥз вал. Акцие котькуд мылкыд карись пыриськыны быгатӥз. Валерий Андреевич, акцие пыриськыса, гуртысьтызы малоимущей семьяосты, трос нылпиен семьяосты «Ошмес» газетэн шумпоттӥз. Солэн тыршеменыз «Ошмес» Шудекысь почта ёзэтэ ньыль экземплярлы тросгес вуиз. Туннэ пумиськонамы но Валерий Андреевич газетлы гожтӥськон кузьман сярысь мылкыдзэ вераз.

Людмила Садыкова удмурт кылын потӥсь газетлэн улонамы валтӥсь инты басьтэмез сярысь малпанзэ шараяз. «Газет бамъёсын асьме гуртоосмы сярысь гожъяло ке, макем со шумпотымон. Соос сярысь мукет ёросъёсын но лыдӟо», - вераз библиотекарь.

Пумиськонмес фоамиранлэсь сяськаос лэсьтонъя мастер-класс азинтӥз. Сое «Оптимист» клубе ветлӥсьёс понна Л. Давлетшина радъяз. «Вылезлы дышетскыны ноку бер ӧвӧл», - малпа Л. Давлетшина. Оптимистъёс но солы дурбасьто. Культура юртын соос понна ужрад дасяло ке, соос шумпотыса лыкто. «Оптимист» клубмы 2014-тӥ арысен ужа. Отчы даслэсь трос арлыдоос ветло. Соослы ми тау шуиськом, котьку милемлы юрттыны дась луэмзылы», - шуэ А. Менгафарова. Нош «Оптимистэ» ветлӥсьёс верало: «Пандемиен сэрен, берло туж шер пумиськылӥськом. Ужрадъёс но азьло кадь трос уг луо ни. Мастер-классъёсы пыриськон сяна, ми гужем велосипедэн ветлыны потаськом, толалтэ куас вылэ султӥськом».

Пумиськонмы шуныт пӧрмиз. Шудекъёс милемыз ческыт пыжиськемъёсынызы куноязы. Ужрадэ лыктэмъёс пӧлысь Насима Гайнанова, Лидия Байдуллина, Людмила Хаертдинова но Евдокия Хасфатова соку ик газетлы гожтӥськыны мылкыд каризы – почта ёзэтэ вуыса, ми соослы подписка одно ик лэсьтомы. Оскиськом, мукетъёс но декада вакытэ почтае дыртозы, анай кылынымы потӥсь газетлы гожтӥськозы. Декада 6-16-тӥ декабре радъяськоз. Соку газетлы гожтӥськон дунтэмгес луоз – 408 манет но 60 коньы.

Газетлэн вуоноез лыдӟисьёс бордын!