Командировкае – вордскем гуртам

Ваньмы умой тодӥськом, газет-журналъёслы гожтӥськон араз кык пол радъяське шуыса. Кык пол декада но ялӥське, куке газет-журналлы гожтӥськон дас нунал ӵоже дунтэмгес луэ. Та нуналъёсы тросгес газетлы мед гожтӥськозы шуыса, пӧртэм сямен выриськом: жингыръяськом гуртъёсы, гурт поселениен кивалтӥсьёслы; кытын газетэз тужгес ӧжыт басьто, отчы юри та вакыт командировкаосы потаськом. Куддыръя асьмеос кыӵе ке гуртэ мыныса, коркась корка ветлӥськом, газетэн тодматӥськом, калыкен кенешиськом.

Декада дыръя Татышлы ёросысь Уразгильдые, кӧня ке пол ини аслам вордскем гуртам «ужаны» потасько. Почтальонкамылы бадӟым юрттэт луэ озьы ветлэме. Тросэз, тужгес мӧйыос, укноязы учкыса почта тыремзэс чакласа, пе, улӥськом. Удалтэ ке, газетъёслы гожтӥськыны почтальонкаез доразы пырыны косо. Куддыр кылоно луэ: «Возьмам-возьмам но озьы ик гожтӥськытэк кылим». Газетъёслэн дыраз вуымтэезлы но ӝожтӥсько газет лыдӟисьёсмы. Кинлы ке уг кельшы газетлэн бамъёсаз выль кылъёсты пыртылэм. Улонэн ӵош кыл но азинтӥське. Ӟуч кылэ но озьы ик выль кылъёс пыро, мукетаз но. Одӥг кышномурт ми палъёсты чик уд поттӥське, бурайёсыз, киргаосыз, янаулъёсыз гинэ поттӥськоды, пе. Таӵе веранэз котькуд ёросын кылыны луэ. Ваньзылэн асьсэ ёросысь адямиос, асьсэ палан ортчем ужрадъёс сярысьгес лыдӟемзы потэ. Нош ми, газетын ужасьёс, арняяз одӥг пол потӥсь газетэ турттӥськом быгатэммыя котькуд интыысь материал пуктыны. Кызьы со пӧрме милям, тӥледлы, лыдӟисьёс,умойгес адӟиське, дыр.

Котьма ке но, нокыӵе шуг-секытъёс уг кышкато, арлы быдэ милемын ӵош тросэз гуртоосы. Зульфия Шакирьянова, Соня но Самиок Сиразетдиновъёс, Валентина но Фёдор Бадрисламовъёс, Екатерина Байдуллина, Галина Байситова, Фидалия Садриева но мукетъёс газетмытэк улонзы тырмыт ӧвӧл шуо. Котьку «Ошмеслэн» эшез вал Валентина Нуртдинова но. Кема ӧвӧл со улон интызэ воштӥз. Янаул городын улыса но, оскиськом, со газетлэсь уз куштӥськы, со вордскем палъёсысьтыз салам кадь луоз.  Азьланьын но кусыпмы медаз ышы, вукогуртъёс. Тазьы ваче син вераськыса гинэ тодыны луэ, мар шугъяськытэ лыдӟисьёсмес, кыӵе тырмымтэос вань ужамы. Ми соосты  ваньзэ учком но куспамы кенешыса быдэстыны тыршом.