Анай-атай доры котьку бертэм потэ

Ми анай-атаймылэн, Зоя но Яков Рияновъёслэн куинь нылъёссы, асьме семьяосынымы кемалась палэнын улӥськом ни. Доре, Татышлы ёросысь Уразгильды гуртэ бертыны быгатӥськом ке, соку ик бурдъёс кылдо, ӝоггес пичи дыръя гольык пыд бызьылэм урамтӥ васькыса, матысь адямиосмес ӟыгыртэм потэ. Ми понна тыршыса, трос пудо-тылобурдо вордыса, корказэс но юртъерзэс ӝик-ӝик возьыса улыны быгато соос.
Анаймес тодӥсьтэмез но ӧвӧл. Со котькинэн огкыл шедьтоз, ваньзылы ӟеч кыл вералоз, дораз пыремъёсты нокинэ но кузьымтэк уз лэзьы. Кырӟаны-эктыны но туж усто со милям. Гуртысьтымы «Дэмен» ансамбльлэн – тужгес яркыт кизилиез. Котькытчы вутскеменыз ваньзэс паймытэ. Етӥз анаймы вӧзын атаймы зӥбытлыкеныз но рос-прос луэменыз висъяське. Ог-огзэс пиналысен шедьтыса но яратыса, соос 38 ар ӵош улон сюрестӥ вамышъяло ини.
Анаймы но атаймы вань улонзэс гуртын улӥзы, уж сюрессы гурт хозяйствоен – «Дэмен» СПК-ен – герӟаськемын. Анаймы фермаын скал кыскиз, атай али но ог дышем сюрестӥз ӵукналы быдэ гуртысьтымы МТМ-е тубе. ДТ-75 тракторез со 17 ар нуллэм. Али ужано МТЗ-82-еныз но 15 ар котькыӵе вакытэ фермаысь пудоослы кормораздатчикен сиён нуллэ-пыртылэ.
Анаймылы Зоя Минкаировналы алигес 58 арес тырмиз, нош атаймы та нуналъёсы 60 арессэ пусъе. Милемыз котьку возьмась анаймес но атаймес, нылпиосмес сюлмысьтызы яратӥсь ӵужаймес но ӵужатаймес, эмеспиоссэс гажась инэймес но вармаймес та чебер нуналъёсынызы ӟечкыламмы потэ. Бадӟым но шырыт сюлэмдылэн шунытэныз котькыӵе дыръёсамы шунтыны быгатӥськоды, улыны кужым сётӥськоды, мылкыдэз ӝутыса лэзиськоды. Ми туж шудо, тӥ милям вань шуыса. Котьку но вамышъялэ улон сюрес кузя ог-огдэс валаса, ог-огдылы юрттыса, вань сюлмысь ог-огдэс яратыса.

Улонлэсь чеберзэ, дунозэ бырйыса,
Потэ тӥледлы кузьмаммы.
Вань шуныт кылъёсты люкаса,
Тӥлесьтыд мӧзмемдэс быдтэммы.

Сӥзиськом тазалык но шудбур,
Ӟеч улон, юн мылкыд, кузь даур.
Милемыз шумпоттэ тӥ кема,
Тӥлесьтыд дуноез  ӧвӧл ук ми понна.

Нылпиосты Роза-Артём, Дина-Юрий, Юстина-Юрий, внукъёсты но внучкады.