Анкаймы, жаляса верано, улонэн туж вазь люкиськиз. Аткай, тон милемлы сое но воштӥд, вань сюлмыныд тыршид, ми умой адямиос мед луомы шуыса. Улон шуккетъёс ӧз куасалтэ тонэ, кужмогес гинэ каризы. Али но тынад бурд улад ми асьмемыз пичи нылъёсыд кадь шӧдӥськом. Милемыз гинэ ӧд будэты, тон дас внукедлы но кык правнукедлы яратоно песятай но ӵужатай луид.
Аткаймы «Дэмен» колхозын бригадир луыса ужаз, пенсие «Татышлинский вестник» газетлэн редакциысьтыз потӥз. Котькытын мед тыршоз, вань ужзэ быгатыса быдэсъяз, ӵош ужась эшъёсыныз огкыл шедьтыны быгатӥз. Али но аткаймы ужтэк пукыны уг быгаты, уз но чида, дыр. Со – гуртмылэн старостаез. Гужем ыжъёсты, скалъёсты кыре келян-а, кыӵе ке субботник радъян-а – гуртысь нокудӥз уж аткайтэк уз пӧрмы. Мукет сямен улыны со уз быгаты. Тазылыкез гинэ мед луоз на азьпалан.
Яратоно аткаймылы нуналлы быдэ шумпоттӥсь иворъёс, яркыт но чебер нуналъёс, ӟечезлы оскон но ваньзэ умойзэ гинэ сӥзиськом. Выль аред шудбур, шумпотон но тазалык гинэ мед ваёз, котькуд вордскем нунал шунытсэ мед кузьмалоз.
Дышетэм-индылэм кылъёсыд
Аръёсын сюлэммес шунтозы.
Асьмеос, арлыдо луыса но,
Тынэсьтыд визь-кенеш куромы.
Мугорын но пичи. Мар кужым нош
Со пичи мугоре дуремын?
Ӝожомон, кайгырон но, синву но
Пальпотон пыр пыдло ватэмын.
Нокинлэсь но юрттэт курытэк, тон
Ачид юрттод калыклы.
Соин гуртамы гажамон тон,
Соин тон дуно котькинлы.
Вань ӟечед, аткай, ваньмыз ик
Мед ӟечен аслыд ик берытскоз.
Вылысь инбамед пилемтэк чик,
Шундыен ворекъясь мед луоз.
Вань матысь адямиосыдлэн нимынызы нылъёсыд Лариса но Наталья.