Бадӟым тау милемлы шудо улон кузьмамдылы

Мар со семья? Огез понна семья – со анай-атай, агай, сузэр, апай, мукетыз понна со – ог-огед сярысь сюлмаськон, шуныт юрт. Нокыӵе узырлык но уз воштэ атайлэсь кужмо киосыныз ӟыгыртэмзэ, анайлэсь небытак чупамзэ.

Нылъёс понна атай – со данъяськымон пиосмурт. Соосты аспӧртэм, адскисьтэм кужым герӟа. Анай – улонтӥ валтӥсь, шонер сюрес возьматӥсь. Анай кӧтӝожзэ ноку нылпиосызлы уз возьматы. Со пальпотэ ке, ми но шумпотӥськом.

Куамын вить ар талэсь азьвыл Татышлы ёросысь Калмияр гуртын егит семья кылдӥз: Зоя Шарифулловна но Валентин Борисович улон сюрессэс герӟазы. Соку анаймылы 18 арес вылэм, атаймылы – 23. Со дырысен Нуриев кузпалъёс ваче ки вамышто, шумпотонъёссэс но сюлмаськонъёссэс шори люко. Егит кузпалъёс атайлэн вордскем юртаз улыны кенешиллям. Атай кема аръёс ӵоже водитель луыса ужаз. Анайлэн кияз котькыӵе уж пӧзе: со поварын но, скал кыскисьын но, амбарын но ужаз. Нош тужгес сюлмаз кельшись ӧр – вуз карон.

Анаен атай милемыз - Анна, Кристина но Ксения нылъёссэс - яратыса, сюлэм шунытсэс сётыса будэтӥзы, тодон-валан сётӥзы, котьку кенешъёсынызы юрттӥзы. Али но ми соослэсь юрттэтсэс шӧдӥськом. Ми куспамы туж тупаса, ог-огмес валаса улӥськом. Таӵе сям милемлы анаен атай пыӵатӥзы. Со понна соослы пумтэм тау шуиськом.

Анай! Атай! Сюлмысь ӟечкыласьком тӥледыз 35 ар ӵош улэменыды. Сӥзиськом юн тазалык, кузь гумыр. Аръёс ортчемья яратонды мед кужмоялоз. Азьланяз но ог-огдэс валаса, тупаса мед улоды, быгатыса мед утёды дормылэсь шунытлыксэ, чеберлыксэ. Бадӟым тау милемлы шудо улон кузьмамды понна.

Та нуналъёсы ик анаймылы 53 арес тырме. Анай, вордскем нуналэныд ӟечкыласьком! Тон шунды выллем улон сюресмес югдытӥськод, ӟечезлы оскыны дышетӥськод, визь-кенешъёсыныд юрттӥськод. Тон – милям матысь эшмы. Бадӟым тау тыныд ваньмыз понна.

Нылъёсты, эмеспиосты, внучкаосты но внукты.