WorldSkills Russia чемпионатэ пыриськизы

Башкортостанын 7-13-тӥ толсуре WorldSkills Russia усьтэм региональной чемпионат ортчиз. Отчы 1000-лэсь трос егитъёс пыриськизы. Соос понна площадкаос ужазы Уфа, Белебей, Бирск, Благовещенск, Нефтекамск, Салават, Стерлитамак, Сибай, Туймазы, Учалы, Мелеуз, Кумертау городъёсын но Кушнаренко, Дуван ёросъёсын. Ӵошатсконъёс 106 пӧртэм компетенциосъя радъяськизы. Башкортостанысь сяна, чемпионатэ Удмуртиысь, Татарстанысь но Владимир улосвылысь студентъёс но экспертъёс пыриськизы.

«Молодые профессионалы» чемпионатлэн региональной этапаз Бирскысь медколледжын куинетӥ курсын дышетскись, Татышлы ёросысь Улысь Балтачысь шор ёзо школаез йылпумъям Виктория Гильмиярова но пыриськиз. Со «Лечебная деятельность» ӧръя тодон-валанзэ, быгатонлыкъёссэ возьматӥз.

 «Молодые профессионалы» чемпионатын 480 адями вормисьёс но призёръёс луизы. Виктория но вормисьёс пӧлын. Ужрадэ дасяськемез сярысь В. Гильмиярова вера: «WorldSkills Russia чемпионатлэн региональной этапаз милям колледжысьтымы куать адями пыриськиз. Чемпионатэ кема, пыр-поч дасяськи. Ӵукнаысен ӝытозь колледжын ӝегатскылӥ. Малы ке шуоно куать модульёс (задачаос) бордын ужано вал. Модульёс бордын трос ужамъя, тросгес юанъёс кылдо. Бадӟым тау дышетӥсьёслы. Соос котьку монэн артэ луизы, валантэмъёс луыку юрттӥзы».

- Нош мар тыныд тужгес секыт сётӥськиз? – юасько Викториялэсь.

- Аудитория азьын вераськонлэсь мон кышкасько. Соку вань тодэмме вунэтӥсько кадь. Чемпионатын аслад ужед сярысь трос верано вал. Кӧня ке куаляса улӥ но собере кышканме вормыны быгатӥ. Ваньзэ возьматӥ, валэктӥ. Нырысетӥ курсын ортчемзэ но тодэ ваёно луиз. Ортчымтэ темаосты но азьпаласен эскери, - шуэ В. Гильмиярова. – Нырысетӥ модуль но секыт сётӥськиз. Задачаосты чумалы пумит костюмъёсын быдэсъяно луиз. Мон ас вылам шӧдӥ, макем секыт куать час ӵоже костюмен ужанэз – висисьёсты эскеронэз.

Виктория чемпионатын нырысетӥ интылы кузё луиз. Табере со чемпионатлэн быдэсросси отборочной этапаз дасяськоз. Ӵошатсконъёс 2022-тӥ арын 10-тӥ южтолэзьысен 25-тӥ оштолэзе радъяськозы.

- WorldSkills Russia чемпионат мыным мар сётӥз? Мон аслэсьтым тодон-валанме, быръем удысам кужымме эскери. Табере мон тодӥсько, кыӵе юанъёс, ужпумъёс мыным капчиен сётӥсько, нош мар бордын ужано на, - вера В. Гильмиярова.

***

«Молодые профессионалы» чемпионат трос егитъёсты огазеяз.

Чемпионатын Башкортостанлэн командаез кыкетӥ интыын луиз. Та интыез республикамы Санкт-Петербургысь командаен люкиз.

Та вормонын Татышлы ёросысь Выль Татышлы школаын дышетскем Гузель Ульдановалэн но люкетэз вань. Со Башкортостанлэн сборной командаяз луиз. Гузель 2019-тӥ арын Выль Татышлы школаез йылпумъяз. Туэ со Россия Федерацилэн Правительствоез бордысь Финансъёсъя университетэз йылпумъяз: Гузель «страховое дело» ӧнеръя тодон-валан басьтӥз. Чемпионатын со «Агент страховой» компетенцияя быгатонлыкъёссэ возьматӥз.

Айбулат ХАЖИН, Башкортостанысь дышетонъя министр: «Чемпионатэ пыриськисьёс асьсэлэсь быгатонлыкъёссэс, тодон-валанзэс эскеро, вуоно профессизылы дасясько. WorldSkills Russia чемпионат пыр потэмъёс – ужзэс тодӥсь ӧнерчиос. Соос предприятиосы ужаны узыр тодон-валанэн вуо. Уж интызылы капчи, вакчи дыр куспын дышо».