Тулыс вуиз ке но, музъем уг на шуна

 Шуныт палась тылобурдоос но кемалась вуизы, нош инкуазь вожектыны уг дырты. Нырысетӥ сяськаосты адӟон вылысь юри арамае потай. Мать-и-мачеха (сяськазэ озьы ик нимаськом ӟуч сямен, нош куарзэ бакакуар шуиськом) сяськаос гурт вӧзын, шур дурын ик будо. Кызьпу арамамы Бармыш шур сьӧрын. Шур вамен выжетӥ потыса, кечсинъёсты-подснежникъёсты утчаны ӧдъяй. Тазэ сяськаез но ӟуч сямен вераськом малы ке. Лымы но ӧвӧл ни кадь, нош подснежникъёс ӧвӧл. Шур вамен мынонъям мынэсьтым кышкаса кыр айы ӵӧж лобӟыса кошкиз. Оло, пи но гурт вӧзын ик потто? Арамаез пыр потыса (кытӥ-отӥ лымы но колано луиз), шундыё интыысь шедьтӥ ик асьмепал подснежникъёсты. Кытын шунды, сопала ик йырзы но берыктэмын. Аслам палисадникысь но лымы быриз ни, нош яратоно крокусъёс но тӧдьы гырлы кадь подснежнике туннэ гинэ йырзэс мычиллям ай музъем пушкысь. Лымыез нюлэскын но трос шуыны уг луы ни, нош инкуазь пурысь туссэ вожлы воштыны уг на дырты. Малы меда? Музъемысь кын уг на быр, дыр. Нырысетӥ мае одно ик гудыртоз но вожектоз, дыр. Ваньмыз ас вакытэныз.