Шып. Кызу: удмурт кылын кусып возён сярысь

Шып. Кызу! Таӵе кылэз, вазиськонэз туж шер кылӥське на, чик но уг верало ни шуыны но луэ.
Трос дыръя "Здрасте!" шуэмез кылоно луэ. Таиз валамон: азьло дыръя школаен кивалтӥсьёс урокез но ӟуч кылын нуыны-валэктыны куро вал. Тон ведь ӟуч сямен умой вераськиськод, уроктэ ӟуч сямен ну шуыса пыкылозы вал. Школаын дышетскисьёслы но ӟеч сям пыӵатыны тыршылӥзы: гуртысь мӧйы мурт-а, тодмотэм адями-а, ваньмынызы ӟечбуръяськоно, "здравствуйте" шуоно шуыса валэктылӥзы.

Мон пинал дыръя "шып кызу" ӵем кылӥськись вазиськон кыл вал. Сое верало вал кин ке доры пырыкузы. "Шып Кызу! Луэ-а пырыны?"- кылӥськод вал мӧйыослэсь. "Ойдо, ортчы. Кин ай со?" - вазёзы пумитаз пырись муртлы. 
Шып Кызу. Вакчияк сэрттом–пертчом та кыл герӟетлэсь пуштроссэ. Шып, шыпырт, шыптым кылъёсты ӟуч кылэ берыктӥд ке,  луоз "мир, тишина, покой".
Кызу ужаськоды шуозы вал. Кызу - "дружно, радостно, хорошо и т.д".
Вакчияк пуштроссэ сэрттыса-пертчыса, валаны луэ, "шып кызу" со - "Мира да радости, благополучия вашему дому".
Сыӵе ик мур пуштросо асьмелэн туж чебер но ӟеч мукетъёсыз вазиськон кылъёсмы "Ӟеч! Ӟечесь! Ӟечбур!" Ӟечбур кылын луэ корка пушкы но пырыны. "Шудо-буро мед луоз улон коркады"шуыса пырозы азьло пырымтэ яке выль корка. "Шудо-буро мед луоз Быдӟынналмы яке Быдӟынналды". Пересьёс тазьы косозы вал ӟечбуръяськыны Быдӟынал дыръя.