Кин пӧйшураны ветлэ гуртэ?

Туэ одӥгез куреге вазь ик пуксиз. Туж шумпотӥ, чипыосыз потозы, вуоно арлы курегъёс луозы шуыса.

Укмыс курегпиос потӥзы. Соос борды ӵош будозы ай шуыса, ёрос базарысь сизьым горд тусо тютюпиос басьтӥ, курег улэ лэзи. Малы ке куреген поттэм чипыос кулыны ӧдъязы. Кыӵе гинэ эмъюм ӧй сётъя, ньылез гинэ кылиз. Дас одӥг тютюпиос ӟеч гинэ будо. Пичи дыръязы мон соосты сьӧд чабей ӝукен сюдӥсько.

Но ма та таӵе? Ӵукна азбаре ваньзы пото, нош ӝыт тютюпиосы одӥген ышылыны кутскизы. Малпасько, бадӟым тылобурдоос нулло.  Огпол бакчаысь потыкум адӟи: атасмы вылэ кыӵе ке пичи пӧйшур ӝабырскем. Зол кесяськиськем куаралы луыса, лэся, юрмеглы-а (ласка) яке бызаралы-а (хорёк) кельшись пӧйшур чиптэм-чаптэм ышиз. Кышкаменыз-а, бакчаям бакчасульдэр пуктылэмысь-а, со ми доры ӧз ни вуылы. Кык бакчасульдэръёсме али ке но возисько.

Кӧня ке улыса, гуртэ ивор вӧлмиз: кыӵе ке пӧйшур гуртысьтымы семьялэсь вандыны вуэм сизьым ӵӧжпиоссылэсь вирзэс юыса кельтэм. Огзэ сьӧраз нуыны выре вылэм, вормымтэ, лэся. Кык ӵӧжпизы гинэ улэп кылем. Ӵӧжпиослэн кузёосыз капкан пуктӥллям, но изъянтӥсь отчы вуылымтэ ни.

Одӥг арын курегъёсты, гидэ пырыса, озьы ик кыӵе ке пӧйшур вандылыса кельтылӥз. Соку гуртэ ӟичы ветлэ шуыса веразы. Нош таиз - сьӧд тусо, гадяз тӧдьыез вань. Таӵе пӧйшурез гуртысьтымы школа палась но адӟылӥллям ни. Малы нюлэскын улӥсь гуртэ пӧйшураны лыктэ? Валантэм.