Янаул ёросысь кышномурт 16 млн манет коньдонзэ ыштӥз

Ма бордысен ваньмыз кутскиз? Нимысьтыз военной операциын бырем пиосмуртлэн кузпалызлы пенсионной фондын «ужась» жингыртэм. Со кышномуртлэсь паспорт даннойёссэ, СНИЛС-лэсь номерзэ юам, картэзлэсь медальзэ лэсьтон понна кулэ шуыса. Собере кышномуртлы ивортӥллям, «Госуслугиын» аккаунтсэ тӥяллям но со понна уголовной йыруж усьтозы шуыса.

Мошенникъёслэн ӵектэмзыя, кышномурт счётысьтыз коньдонзэ басьтэм, «эскерон» ортчытон понна сое курьерлы сётэм. Мошенникъёслэн ыстэм адямиенызы Янаулын пумиськыса, со 9 млн манетсэ сётэм,  Нефтекамскысь курьерлы – 7 млн манетсэ. Йыртэмасьёс дугдыны малпаллямтэ, нош ик кышномуртэ пӧяно кариськиллям – тодмоосызлэсь, матысьёсызлэсь пунэмен уксё курыны ӵектӥллям. Одӥгез тодмоез кышномуртэ «сайкатэм», мошенникъёслэн киязы шедемед шуыса. Озьыен 41 аресъем кышномурт 16 млн манет коньдонтэк кылем. Со коньдонлэн бадӟым люкетэз картэзлы басьтэм выплатаосыз вылэм.