Пӧяськисьёслэн лыдзы йылэ

Банкъёсын «ужасьёс» но ӵем жингырто. Жаляса верано, пӧяськисьёслэн куриказы трос адями шеде.

Уфаысь полицие та нуналъёсы кышномурт вазиськем. 56 аресъем нылкышнолы тодмотэм пиосмурт жингыртэм, банкын ужасько шуэм Нылкышно пӧяськисьлы оскем. Пиосмурт верам, нылкышнолэн счётысьтыз коньдонзэ лушканы туртто шуыса. Со оскытэм, таӵе югдурысь кредит басьтыса потыны луэ шуыса. Нылкышно соглаш луэм: тодмотэм пиосмуртэз 340 манет тыр кредит оформить карытэм но коньдонзэ тодмотэм счётэ выжтэм.

Нош Ишимбай ёросысь Ишеево гуртын улӥсь кышномурт мошенникъёслы 300 сюрс манетсэ сётэм. Со тодмо видеохостингысь инвестициос сярысь рекламаез учкем. Собере солы тодмотэм адямиос жингыртыны кутскиллям. Соос асьсэды инвестиционной компаниысь ӧнерчиос шуыса вераллям. Пӧяськисьёслы нылкышнолэсь йырзэ берыктыны пӧмем: табыш потто шуыса, нылкышно тодмотэм адямиослэн ӵектэм счётазы 300 сюрс коньдонзэ понэм.

Башкортостанысь МВД тодады вайытэ: тодмотэм адямиослэн счётъёсазы коньдон эн выжтэ! Банкысь жингыртӥсьёс луизы ке, трубкадэс понэ. Тодады возе, мошенникъёс котькыӵе номерысен жингыртыны быгато. Соцсетьёсын но туж сак луоно. Матысьёстылэсь кыӵе ке кышкыт ивор сярысь, соослы коньдон юрттэт кулэ шуыса смс вуиз ке, одно ик соосын герӟаське.