Масксеть кышкытлыкъёслэсь мед утёз

Шаермес утисьёслы юрттонын волонтёръёслэн ужзы номырин мертантэм но: соос масксеть кертто, окопын, блиндажын кулэ луись сюсьтылъёс лэсьто, шуныт дӥськут вуро, нырос-пӧзьы кертто, коньдон люкало но мукет.

Башкортостанын 150-лэсь трос волонтёр цехъёс кылдытэмын. Отын дас сюрслэсь трос адями тырше. Волонтёр ужъёсты радъянын Башкортостан, Россиысь регионъёсын ӵошатыса, нырысетӥос пӧлын луэ. Волонтёръёслэн ужзылы Башкортостанлэн тӧроез Радий Хабиров но вылӥ дунъет сётэ.

- Республикаысь волонтёръёс шаермес утисьёслы пӧртэм ласянь юртто, - вера Радий Хабиров. – Ваньзылы бадӟым тау шуисько. Ӵошен гинэ вормонэз вайыны быгатомы.

Сӥзьыл каникулъёс дыръя Татышлы ёросысь Выль Татышлыысь полилингвальной школаын ужасьёс, дышетӥсьёс но, нимысьтыз военной операцие пыриськисьёслы юрттон вылысь, масксеть керттӥзы. Соослы та ужез быдэстонъя мастер-класс радъяз гуртысьтызы Альфира Кабиокова. Огъя кужымен вакчи дыр куспын соос пиосты кышкытлыкъёслэсь утись «шобрет» пӧрмытӥзы.  

Фото: МБОУ ПМШ с. Новые Татышлы МР Татышлинский район