Алтауын "Сад памяти" утялтӥськиз

«Сад памяти» - СВО-ын геройлыко бырем пиосмуртъёс сярысь верась инты. Отын шыпыт, тылобурдоослэн чирдэм куараоссы туала кышкыт югдурез вунэтыны юртто. Кема ӧвӧл гинэ татчы писпуосты ваизы вал, нош улмопуос емышъёссэс сёто ини. Озьыен, ож бусыосын бырем, туннэ нуналэ тушмонлы пумит сылӥсь пиосмуртъёс луэмен улон азьпала мынэ.

Гуртоос садэз утё. Арлы быдэ сӥзьыл но тулыс алтауос, ӵошен люкаськыса, татысь жуг-жагез утялтыны пото. Туэ но сад тазатӥськиз. Утялтӥськон ужрадэ Валерий Фаршатовлэн атайез Кабитъян Нигаевич но пыриськиз. Со котькуд писпуэз, ыштэм пизэ выллем, лякыт вешаса потӥз. Пиосмурт синкылиоссэ ӧз адӟыты ке но, шӧдӥськиз – сюлэмыз бӧрдӥз.

Фото: Алтаевский сельский клуб Бураевского района