Школаын Быдӟым Атыкай ожын Вормонлы сӥзем ужрад ортчиз

Быдӟым Атыкай ожын быремъёслэсь данзэс вылэ ӝутон но со аръёслэсь кышкытлыксэс тодэ вайытон вылысь школаын бадӟым ужрад ортчиз. Онлайн амалэн диктантэз гожтон сяна, дышетскон юртын Россиысь калыкъёслэн огъя луон арзылы сӥзем концерт программа радъяськиз. Отын ёросысь «Мурпамаш» но «Ошмес» ансамбльёс пор но удмурт кылын Вормонлы сӥзем кырӟанъёсты быдэстӥзы. Озьы ик та нуналэ школаын «Катюша» кырӟан ӟуч, пор но удмурт кылъёсын чузъяськиз.