Ӵошен ужаны шулдыр но капчи

«Чистый Танып+» регионъёс куспысь экологической акция 2018-тӥ арысен «Вода России» проект улсын быдэстӥське. Акция Башкортостанлэн уйпал ёросъёстӥз но Пермь шаерысь Чернушка ёростӥ (Танып шур кытӥ вия) ортче. Инкуазез утёнлы, шур, ӵыпет дуръёсты, ошмесъёсты тазатонлы, жуг-жаг бичанлы сӥзем ужрад трос адямиосты огазея. Улысь Балтач гурт поселениысь гуртъёсын улӥсьёс ортчы арлы быдэ пырисько. Туэ но шуръёс котырысь жуг-жаг бичаны трос адямиос потӥзы. Улысь Балтач гурт поселенилэн администрациеныз кивалтӥсь Эдуард Рахимзянов вконтакте вотэс бамаз субботнике потэмъёслы – Улысь Балтачын, Вылысь Балтачын, Ивановкаын, Кызыл-Ярын улӥсьёслы – тау кылъёссэ вера. «Гурт поселениын шур котыръёсты утялтонлы сӥзем ужрадъёс азинскозы на. Таяз арняын Бигиней гуртын субботник ортчытыны чакламын. Мылкыд карисьёсты курисько ужрадэ потыны. Улон интымес, гурт котырмес асьмеос ке ӧм, кин соосты утялтоз? Шур, ӵыпет, ошмес дуръёс чылкыт мед луозы шуыса асьмелы сюлмаськоно», - гожтэ Эдуард Бурханович.

Фото: Эдуард Рахимзянов