Малпанъёссэс шара верало

Татышлы ёросысь  Улысь Балтач гурт поселениысь калык понна «Программа поддержки местных инициатив» проект выль ӧвӧл. Солэсь пайдазэ татын ӟеч тодо ни. 2016-тӥ арысен проект пӧртэм гуртъёсысь сюресъёсты тупатыны, пожарной машиналы гараж лэсьтыны, МТЗ-82.1 трактор но солы навесной оборудование басьтыны юрттӥз. Та дыр куспын трос ужъёс быдэстэмын ке но, сюлмаськонъёс ӧжыт ӧвӧл на. Соин татысь калык выльысь «Программа поддержки местных инициатив» проектэ пыриськыны мылкыд каре.

Али Улысь Балтачын со пумысен собраниос, пумиськонъёс ортчыло. 19-тӥ коньывуонэ, кылсярысь, культура юртын радъяськем кенешонэ трос калык люкаськиз. Та нуналэ соос асьсэлэсь малпанъёссэс но шара веразы. Кылсярысь, проектэ пыриськыса, гурт поселенилы выль пожарной машина басьтыны луысал яке вуэн герӟаськем ужпумъёс но быдэстэмез кулэ каро ни. Кенешонын ӵыпетэз муромытон, шай кенерез выльдон сярысь но верасьёс луизы.

Проектэ пыриськон сярысь «Рассвет» СПК-лэн нырысетӥ номеро фермаяз но, школаын радъяськем анай-атайёслэн собраниязы но вераськизы. Отчы люкаськемъёс трос пӧртэм ужпумъёсты ӝутӥзы. Кыӵе сюлмаськытӥсь ужпум понна тужгес трос куара сётозы, сыӵе уж борды ик басьтӥськозы. Со тодмо луоз йылпумъян собраниын. Нош солэсь азьвыл пусйыны кулэ,  2023-тӥ арын проектын шӧдскымон воштӥськонъёс луозы шуыса. Гурт калык понна отын тужгес шумпотымонэз – вуоно арын котькуд проектлы одӥг миллион 200 сюрс манетозь субсидия басьтыны луоз.