Ожысь ветеранэз Быдӟым Вормон Нуналэн ӟечкылазы

Ожысь ветеран Шамсутдин Шайхутдинович Шакиров трос медальёслэн, Данъян грамотаослэн кузёзы но калыкен гажано адями.
Со  1926-тӥ арысь 14-тӥ куартолэзе вордскем. Сизьым аресаз со школае дышетскыны вамыштэм.
- Нырысетӥ классысен ньылетӥ классозь Садыр Тимеряевич Тимиряев дышетӥз. Милемлы соин туж удалтӥз. Огпол но куаразэ ӧз ӝуты, ваньзэ ӟеч валэктӥз, - вера Шамсутдин агай.
Пиосмуртлэн егит дырыз тылож вакытэ тупа. Со ас синмыныз тылож суредъёсты адӟе, солэсь секытлыксэ ас вылаз шӧдэ.
«20-тӥ июне сабантуй ортчытӥм. Бусылэн кӧняез ке гырытэк кылемын вал. Ми сое валэн гырыса быдтӥмы. 24-тӥ июне гыронэз быдтыса бертыку, дворе люкаськем туж трос калыкез адӟим. «Война!… Германия напала…» чузъяське котыр, - тылож кутскем сярысь тодаз вае Шамсутдин агай. – Кылӥське бӧрдон, ӝожтӥськон. Пиосты, воргоронъёсты армие келямы. Гуртэ нылпиос, нылкышноос, арлыдоос кылизы. Вань гурт ужъёс соослэн пельпумазы усизы».
Шамсутдин агай дас сизьым аресаз вордскем палъёсыныз люкиськоно луэ. Уфаысь сое Оренбурге 92-тӥ учебно-стрелковой полке келяло. Отын со миномётчиклы дышетске. Собере воздушно-десантной бригадае келяло.
- Калинин городэ дышетыны кутӥзы. Самолётысь парашютэн тэтчаны дышетӥзы. Собере эшелонэн фронтэ лэзизы, - вера Шамсутдин Шайхутдинович. – Венгрие 3-тӥ Украин фронтэ шеди. Милемын маршал Толбухин кивалтӥз. Собере Австрия музъеме 2-тӥ Украин фронтэ выжтӥзы. Соин маршал Маликовский кивалтӥз. Венаез басьтэм бере вылӥ награда «Вена городэз басьтэм понна» орден сётӥзы.
Ветеранлэн ож сюресэз соин уг йылпумъяськы. Соос Чехословакие наступлениен пото. Ӵапак соку Левитан ивортэ: «1945-тӥ арысь 9-тӥ маез Вормон Нуналэн лыдъяно! Германия ож тӥрлыкезлэсь мозмытске…» «Та выль ивор йыр вадьсын чилектэм кадь луиз, калык интыяз ик «кынмиз». Собере гинэ котырак шумпотон куараос вӧлмизы», - вера ветеран.
Ыбылэм-пуштылэм куараос чалмем, каргам тушмон кузёяськемысь дугдэм бере но ожгарчиослэн сюлэмъёссы вӧсь луизы на. Ватытэк кылем солдатъёслэсь «кынмем» мугорзэс Вынлыко шайвыл лэсьтыса, отчы согиллям.
- Лагерьёсты октыны-калтыны лэзизы. Мур гуэ скелетъёс гинэ кылиллям на. Отчы быремъёслэсь нимъёссэс али тодэм потэ, - вера Шамсутдин агай. Веранзэ азьланьтыса, со шуэ: «Инкуазь но адями ог-огенызы юн герӟаськемын, шуо. Со зэм вылэм. Нюлэсъёслэн, шуръёслэн, бусыослэн ӵыдонтэм чеберлыксы соку бездӥз. Уӵыослэн, тюрагайёслэн кырӟамзы куспетӥ кадь луиз. Яке ми соосты ӧм кылэ ни? Возьвыл сяськаосты но ӧм синйылтэ. Тыложысь иворъёсты кышкаса витим, малы ке шуоно кудӥзлы шумпотон, кудӥзлы куректон ивор вуылӥз. Туж курадӟиз асьме калык. Сиён тырмымтэен куар сиылӥм. Потлэсь гурыоссэ но куаръёссэ изыса, кӧтэз тырим. Камыш выжыез пызь карыса, бусыысь кынмем картофкаез бичаса, табань пыжылӥм, пушнерен беризь куарез шыд пӧзьтыса сиылӥм. Турын-куар но уг тырмы вал, сое октыны гуртлэсь кыдёке ветлылӥм. Ю-нянь удалтэ ке, трудоденьлы 2-3 килограмм пызь сётылӥзы. Уг удалты ке, уг сёто вал».
Ветеранлэн тодаз на выт тыремзы. «Котькуд коркась выт бичазы. 44 килограмм пудо сӥль, 200 курегпуз, 280 литр йӧл, 2 килограмм ыжгон, бун, солдатъёслы нырос-пӧзь керттыса лэзьылӥм. Сое ваньзэ Пермь шаерысь Чернушка яке Куеда чугун сюрес станциосы нуыса келязы. Куд-ог дыръя Уфае нуизы. Кык сю-куинь сю иськемлы матэ сюресэз олокӧня нунал ӟеч сиськытэк пыдын ортчылӥзы».
Шамсутдин агай дораз турнан вакыт бертэ. Закия нимо нылэн семья кылдытэ. «Ачиз арганчи, усто кырӟась но эктӥсь. Со сяна, усто механизатор-трактористка, «Уран» колхозамы азьветлӥсь ужась. Вить нылпи будэтӥм, - вера Шамсутдин агай. – Жаляса верано, 2019-тӥ арын Закия кузпалы улонэн люкиськиз. Нош мынам гумыре вань на вылэм». Шамсутдин агай ачиз но механизатор луыса тыршем. Кызь ар ӵоже комбайнлэн штурвал сьӧраз выль ю-нянез октэм. Пенсие потытозяз азьветлӥсь ужасьлэсь туспуктэмзэ Данъян пулысь басьтылӥллямтэ. Со Тазлар гурт поселениын депутат, ревизия комиссилэн ёзчиез вылэм. Нош ваньмон дыръяз со кияз арганзэ кутылэм. «Али но куддыръя тальянме киям кутылӥсько. Вормон Нуналэ герман кюйез шудӥсько. Со кырӟанэн мон эшъёсме но, асме но оже келяй. Сое шудыку синкылиосы пото, ожысь бертымтэ эшъёсы тодам лыкто», - вера ожысь ветеран.
Улоназ Шамсутдин агай куинь корка ӝутэм. Берлозэ 2003-тӥ арын кирпичлэсь пуктэм. «Ветеранъёслэн лыдзы арысь аре ӧжыта. Зэм, та шудбуро улонын улэм потэ на, - шуэ Шамсутдин агай. – Пиналъёс шудо-буро мед луозы! Ноку медаз адӟе ожез».