-16 °С
Салкым
Антитеррор
Вань иворъёс
Знаменательные даты
19 куартолэзе 2020, 16:05

«Взвейтесь кострами, синие ночи…»

Социальной сетьёс пыр котькуд празднике открыткаос келяло. Тодэ вайытытэк уг кельто совето вакытэ луэмъёссэ но. Соосыз ум пусйиське ни бере, вунэтоно. Историе гинэ кылизы на Владимир Ленинлэн ворскем но кулэм нуналъёсыз, комсомоллэн нуналэз. Толон ик ӟечкыланы кутскизы Пионеръёслэн нуналэнызы.

Школа вакытэ ке берытскид, 19-тӥ куартолэзь - ёросын пионеръёслэн слётсы ортчон нунал. Мон отчы знамя ӝутыса мынӥсько вал. Слётын мукет школаосын дышетскись тодмоосын пумиськылӥм, выльёссэ шедьтылӥм. Школаын аслад пионер отрядад ӟеч ужаса гинэ ёрос слётэ мыныны луэ вал. Отчы сюрон – со сыӵе дан вал соку.
Комсомолэ пырытозь Юрий Гагаринлэсь нимзэ нуллӥсь пионер отрядмылэн председателез луыса ветлӥ. Котькуд люкаськонын пӧртэм отрядъёслэн тӧрооссы дружиналэн кенешезлэн кивалтӥсезлы рапорт сёто вал. Классамы отрядмылэн аслаз сэрегез вал. Ваньмы умой тодӥськом вал девизмес, космос темалы сӥзем кырӟанмес но уин сайкатыса но кырӟасалмы.
Кылем даурлэн 80-тӥ аръёсаз пионер вакытмы – со номырин воштонтэм, вунэтонтэм дыр. «Взвейтесь кострами, синие ночи…» кырӟанлэн кылъёсыз али но тодын, кӧня ар ортчиз ни ке но. Тимуровской командамы нош кыӵе зол ужа вал. Гуртын улӥсь оген пересьёслы соку нокыӵе социальной ужасьёс кулэ ӧз луылэ, пионеръёс мыно но лэсьто вал. Ужам понна чаен ке сектало, кампет ке сётыса лэзё – солэсь но бадӟым шумпотон ӧй вал. Макулатура, металлолом-а люкано, тулыс каникул дыръя кызьпу пучы-а бичано – соос котьку дась вал ваньзэ лэсьтыны. Соин «Пионер – всем ребятам пример», «Будь готов! – Всегда готов!» вазиськонъёс ми понна со огшоры кылъёс гинэ ӧй вал, со – улон но дышетскон сям. Соосты лыдӟыса, туала нылпиослэн серемзы гинэ потоз, вылды, нош ми ваньмызлы оскиськом, лэсьтӥськом вал.
Туннэ – асьмелэн нуналмы, пионеръёс, туалаосыз но, горд галстук нуллэмъёсыз но!
Читайте нас в