+9 °С
Салкым
Антитеррор
Вань иворъёс

«Гурт сярысь малпан отчы пыремлэсь азьло ик кылдэ»

Улон азьлань мынэмъя гуртъёсын улӥсьёс но соин ӵош вамышъяло. Выль фельдшерско-акушерской пунктъёс ӝутӥсько, школаосын, нылпи садъёсын, культура юртъёсын тупатӥськон ужъёс радъясько, магазинъёс усьтӥсько, калыкмы выль юртъёс пуктэ шуыса, сюлэм шумпотэ. Коркаос ӝутӥсько бере, улӥсьёсыз но луозы, нылпиос но вордӥськозы.

Янаул ёросысь Вуж Вараш гурт поселение ӟеч азинскись поселениос пӧлын лыдъяське. Отысь гуртъёслэн урамъёстӥзы ортчыку садъёсысь чебересь сяськаосты, утялтэм ульчаосты адӟыса, синъёс ик шутэтско, нош удмурт кылын таӵе гожтэмъёс вӧзтӥ ортчыку, сюлмын нясь-нясь луэ.
Улон-вылон интыослэн чеберлыксылы сӥзем арын лэсьтэм ужъёссы сярысь вераським ньыль гуртъёсты – Вуж Вараш, Выль Вараш, Будья Вараш но Наняды – огазеясь гурт поселенилэн администрациеныз кивалтӥсен Эльза Минликузинаен. Эльза Меншараевна туэ быдэстэм ужъёссы сярысь пыр-поч вера:
- Зэм, туэ ужаны секытгес луиз. Озьы но тэк ӧм пуке, маке но лэсьтӥськом, тыршиськом. Гуртъёсын ваньмыз сузямын-утялтэмын, урамъёсысь пыртоноез пыртэмын, басьтоноез басьтэмын. Арлы быдэ сюрес дуръёслы саклык висъяськом: жуг-жагзэ бичаськом, турынзэ турнаськом. Малы ке шуоно гурт сярысь малпан отчы пыремлэсь азьло ик кылдэ. Туэ Вуж Варашысь Центральной но Парковой урамъёсы асьме коньдонэн ямочной ремонт лэсьтытӥм. Та уж борды Янаулысь ДРСУ-ын ужасьёс басьтӥськизы. Нош Арланской УСПД –ын ужасьёс Четырман-Вуж Вараш сюресэз тупатон бордын тыршо. Та сюрес кема аръёс ӵоже туж урод югдурын улӥз.
Выль Вараше пырон но потон интыосы кенер кутӥм. Отчы «Аллея Победы» лэсьтӥм, 75 выжы палэзь но мукет писпуос мерттӥм. Та уже гурт калык но гурт поселенилэн администрацияз ужасьёс мыло-кыдо пыриськизы.
Ньыляз ик гуртъёсын крупно-габаритной жуг-жаглы площадкаос тупатӥм. Республика бюджетысь коньдон висъяськемен, контейнеръёсты ворсэтъёсын лэсьтӥм. Выль Вараше нимысьтыз кык контейнерен площадка тупатӥм, Вуж Вараше кык контейнер пуктӥм.
Гуртын улӥсьёс но юртъер котыръёссэс утялтонъя трос ужазы: коркаоссэс чеберъязы-буязы, выльдонозэ выльдӥзы. Калык юрт котырзэ утялтыса, турнаса возе. Пусйысал Вуж Варашысь Елена но Рудим Низамутдиновъёслэсь, Роза но Виктор Галиуллинъёслэсь юртъёссэс. Культура юртмы но туж чебер сяськаос пӧлы «выемын». Татын ужасьёс чылкытлыклы, чеберлыклы трос саклык висъяло.
Самоизоляция вакытэ вуж варашъёсын Пермь шаерен радъям регионъёс куспысь «Деревенька моя» конкурсэ пыриським, «Самая творческая территория» номинациез бырйим вал. Онлайн амалэн ортчем ужрадэ Нижний Новгород, Киров, Иркутск, Оренбург, Самара, Ульяновск улосъёсысь, Башкортостанысь но Удмуртиысь, Красноярск но Пермь шаеръёсысь населённой пунктъёс пыриськизы. Презентациямы творческой коллективъёсты, киужен вырисьёсты, адӟем карымон семьяосты, кема ар ӵошен улэм кузпалъёсты возьматыны тыршим. Та ужлы трос кужымзэ понӥз, мылкыдзэ сётӥз Вуж Варашысь библиотекаын ужась Марина Хисамутдинова. Жаляса верано, финалэ потыны ӧз пӧрмы. Вуоно арын нош конкурсэ пыриськыны мылкыдмы вань. Соку янгышъёсты лыдэ басьтомы ни.
Коронавирусэн сэрен, гуртъёсын вӧсьёсты ортчытыны ӧм быгатэ. Вӧсь Будья Варашын гинэ луиз.
Туэлы одӥгез ужпум - ППМИ проектъя Наняды гуртысь шай кенерез но шай вылысь коркаез тупатонэз йылпумъян. Али со понна материал ваемзэс возьмаськом. Та гуртын ик «Благоустройство колодцев» программая гудӟем тупатэмын.
«Реальные дела» программая Наняды гуртэ спортивной площадка лэсьтӥм. Соин та гуртын улӥсьёсын туэ «Трезвое село» конкурсэ пыриськиськом. Та темая вераськонъёс ортчытомы, выставкаос радъяломы, велопробег луоз. выль спорт площадка чылкыт омырын пӧртэм шудонъёс ортчытыны котькинэ возьма. Волейболэн-а, баскетболэн‑а, футболэн-а шудэмзы потэ, мед лыктозы, мед шудозы. Конкурслы йылпумъянъёс шуркынмон толэзьлэн пумаз лэсьтозы. Со дырозь милемыз трос ужъёс витё на.
Читайте нас в