Гужемлэн берпуметӥ толэзез: сӥзьыл пала кыстӥськон

Тазьы серем пыр шуыны луысал оглом гудырикошкон толэзь сярысь. Вунэтоно ӧвӧл гудыриосты но. Али соос тужгес кужмогес кылӥсько кадь, кошкемзы уг поты, лэся. Турын дасямын, узы-боры бичамын, кинлэн ке кынтыса толлы кельтэмын, кин ке варення пӧзьтылӥз. Синмез мальдыто садъёсысь пӧртэм буёло сяськаос. Кин гужембыт тыршиз, соослэн бакча сиёнъёссы но ӟеч будӥзы, дыр. Али - толлы пӧртэм заготовкаос лэсьтон вакыт. Ӝӧк вылэ ческыт сиён вуттон понна, ох! кӧня тыршоно луэ. Кутскиз ни губияны яратӥсьёслэн "зарни" дырзы.