Беризь сяська паймытэ, синмаськытэ но лӧптытэ

Беризь сяська ческыт зыныныз гинэ ӧвӧл, адямилэн тазалыкезлы пайдаё луэменыз но висъяське. Кылсярысь, ческыт зыно сяська кынмыса висьыны шедемъёслы умой юрттэт луоз. Угось отын кыӵе гинэ макро но микроэлеменъёс ӧвӧл. Химиез тодэ ваид ке, беризь сяська флавоноидъёсын, гликозидъёсын, эфирной вӧйёсын но адямилы кулэ луись мукет веществоосын  узыр. Озьыен, сяська температураез но уськытоз, микробъёсын но «нюръяськоз», вирез но кизертоз, кызонэз но дугдытоз, сабырлык но кузьмалоз.

Беризь сяськалэн пайдаез мед луоз шуон понна, сое тодыса бичаны но куасьтыны кулэ. Интернет вотосысь кенешъёслы оскид ке, будосэз 23-26 градус шуныт нуналэ лымшырозь бичано, пе. Соку сяськаын тужгес но трос пайдаё макеосыз луо. Куасьтыны сяськаез шунды шорын уг косо: чылкыт, шуныт но кӧс интыын солы туж кельшоз.

Шонер бичам но куасьтэм сяськаосын пайдаяськыны но тодыса кулэ. Нош ик Интернет вотослы вазиськид ке, отысь кенешчиос сяськаез чай интые юыны косо. Вӧзаз ватсало на: беризь сяськаен вуэз дугдытэк юыны уг яра, соку со тазалыклы пайда уз вайы, урод кароз. Кылсярысь, ческыт зыно будосэз сюлэменызы курадӟисьёслы, пинал возьмась кышномуртъёслы но кык аресозь нылпиослы юыны уг яра.

Озьыен, беризь сяськалэн пайдаез бадӟым вылэм. Кин ке соин эмъяське, нош кин ке ческыт зынызлы синмаське.