Тамак ӵын пӧлын ум улэ!

Милемын артэ пукись кышномурт пиелэсь йырзэ маялтӥз но вераны кутскиз: «Кыско, пие, апайёс но кыско. Со туж урод маке – тамак кыскон. Мон но кыскисько вал, кызь ар но ӝыны, ньыльдон вить аресозям, тамак ӵын пӧлын улӥ. Сизьым ар луиз ини кысконэз куштэмелы. Табере ачим жалясько, марлы меда со зын маке борды басьтӥськи шуыса. Кӧня тазалыкме быдтӥ кысконэн сэрен?» Ми мар вазьыны ик паймим. Мар вералод ини таӵе дыръя. Ярам, аръёс ортчыса куштӥськыны быгатэм.

- Мар со тамакез куштон? – аслэсьтыз ачиз юаса выллем веранзэ азьланьтӥз Тамара Викторовна (нимыз воштэмын). – Ӵукналы быдэ кызондэ вунэтон? Кӧня ке пыдын вамышъям берад ик жадёнэд сярысь вунэтон? Тамак поттӥсьёслэсь, тамакен вузкарисьёслэсь коньдон пуйызэс тырытэмысь дугдон? Таӵе юанъёс туж трос. Зэм, мон трос пол кысконэз вунэтыны малпалляй. Но… Куштӥськи соку, куке пиелэн классэн кивалтӥсез мыным жингыртӥз, пиды школаын тамак, пе, кыске шуыса вераз. Азьло мон кузпалыным ӵош балконын тамак кыскисько вал. Пие но, нылы но сое пичиысен адӟыса будӥзы. Милесьтым ик адӟем карыса пие но тамак борды «биниськем». Макем бадӟым янгыш лэсьтэмме, мон туж бер валай. Тамак кыскисьёс, эн оске, кысконэз куштыны секыт шуэмзылы. Мон со пыр потӥ. Ас азяд курон пуктыны но собере сое быдэстыны гинэ быгатоно. Кык-куинь нунал кыскытэк улэмед бере, астэ мукет адямиен кожаськод кадь. Кыскон сярысь малпан ӧжытлы но йырысь уг поты. Одӥг арня ортчыса гинэ валай, мон тамак сярысь уг малпаськы ни шуыса. Валай, мон кыскисьтэм адями шуыса.

Кӧня ке минут чалмыт пукемез бере, кышномурт нош ик вераны кутскиз:

- Кин кема аръёс ӵоже ни кыске, тӥледлы вазиськисько: тамак ӧз акыльты-а, кызьы тазалыкты? Тӥ – нылпиостылы улэп пример, соос, анай-атай пурккето бере, милемлы но кыскыны яра шуыса валало. Нош дырын-дырын гинэ кыскисьёслы вераме потэ – эн узырмытэ тамакен вузкарисьёсты. Малы лёгоно со мажесэ, кудаз лёгӥзы ни мукет тамак кыскисьёс – табере соос тамаксылэсь куштӥськыны малпало. Аръёс ортчыса, тӥ но соослэн радазы вуоды ук.

Ноку тамак кыскымтэ адямиослы но вазиськеме потэ:

- Тӥ уд валаське, макем шудо адямиос шуыса. Тӥляд улонды никотинэн герӟаськемын ӧвӧл. Тӥледын никотин уг кивалты. Тӥ асьтэлэн мылкыд каремдыя, асьтэ улонэныды каньыл улӥськоды.