"Пыд йылысь погыртон сяна, ГЛПС синтэк но кельтэ"

Ваньмыз кутскем геморрагической лихорадка висён бордысен. «Пыд йылысь погыртон сяна, ГЛПС синтэк но кельтэ тодэ. Сентябрь толэзьысен синъёсы ляб адӟыны кутскизы. Нуналысь нуналэ секытгес но секытгес луиз. Толшор толэзе синъёсылы операция лэсьтытӥ », - вераз тодмое.

Башкортостанысь Роспотребнадзорлэн ивортэмезъя, 2022-тӥ арын республикаын 1724 адями ГЛПС-эн висьыны усем. 2021-тӥ арен ӵошатыса, та лыдпус 6,3 поллы тросгес. «Шыр» висён, кылсярысь, ноябрь толэзе Туймазы ёросын паськыт вӧлмиз. Школаын дышетскисьёс но висьыны усизы. Со пумысен регионысь Роспотребнадзорлэн эпидемиологической эскеронъёсъя ёзэтэн кивалтӥсь Венера Саттарова вера: «Туймазыын 31 адямилы геморрагической лихорадка диагноз пуктэмын вал. Соос пӧлысь 19-эз – нылпиос. ГЛПС-лэн инкубационной вакытэз 49 нунал ӵоже луыны быгатэ. Соин сое адямиос сентябрь толэзе ик «пумиталлям», шуыны луоз. «Шыр» висен адямилэн улонэзлы кышкытлык кылдытэ. Соин солэсь утиськонлы бадӟым саклык висъяно. Та висёнэн толалтэ но черланы луэ. тужгес чакласьконо гуртын улӥсьёслы. Малы ке шуоно толалтэ шыръёс, сиён утчаса, бакча сиёнъёс возён интыосы - гуосы, гулбечъёсы -  пыро. Соин шыръёс алязы ке, соосты быдтыны сюлмаськоно, гигиенаез чаклано».

Кылем арын Татышлы ёросын но ГЛПС-эн висисьёс трос луиллям. Вылысь Татышлыысь эмъюртын ивортэмзыя, 26 адями «шыр» черен черлам, 2021-тӥ арын 6 адями висем.