Шунды котькинлы огкадь пиштэ

Котьмаин тунсыкъяськись нылашлы школаын туж кельше, шуэ. Со яратэ технология, суредаськон, математика, физкультура урокъёсты. Физкультура урокъёсазы футболэн, «Белый медведь», «День и ночь» шудонъёсын шудыны солы туж кельше. Со сяна, Юлиана туж чебер суредаське но эктэ. Суредаськыны солы кисточкаен кельше. Сьӧд бумага вылын суредъёсыз но быдэс альбом люкаськемын ни. Куддыръя анаеныз ӵош но суредасько, ӵошатско: кудзылэн чебергес пӧрмоз. Юлиана дораз юрттӥськыны уг вунэты: тусьты-пуньы миське, корказы утялтӥське, ӵужатаеныз лымы сузяло.
Вераськыны мыло-кыдо нылаш Софьяен, Каринаен, Ларисаен, Настяен эшъяське, реабилитационной центрын но вань эшъёсыз. Кылсярысь, отын со Альмирен ӵош эктыны яратэ, Ренален шудэ. Кылем арын татын ужась воспитательлэн Юлия Данисовна Фархуллиналэн кивалтэмез улсын выжыкыл гожтыса, «Звенит струна души моей» республика конкурсэ лэзизы. Отысь со Данъян гожтэтэн бертӥз. 2020-тӥ арын Юлиана анаеныз Уфае «Балл маленьких принцесс» ужрадэ вуылӥзы. Нылашлэн со ужрадысь республикалэн тӧроеныз туспуктэмез но вань.
Юлианалэн анаезлэн Майялэн осконэз вань: будӥзгес ке, нылыз дуно эмъюмъёстэк но улыны быгатоз, куке но сое кышкатэк котькытчы лэзьыны быгатоз.