Ошмес эмчиез тодазы вайытэ

Мария Мыльникова Бурай ёросын вордскем, фельдшерлы Бирскын дышетскем. 1940-тӥ арын Кардон-Арибаше вуыса, эмчи вань улонзэ та рабочей посёлоклы сӥзе. Гуртысь фельдшер - со сыӵе ик врач. Уез-нуналэз учкытэк, котькыӵе куазен со дыртэ вылэм висисьёсыз доры. Эмчилы ӵем дыръя нылпи ваисьёслы юрттоно, хирурглэсь ужзэ но быдэсъяно луылэм. Ӟеч эмъясь сярысь кылысь кылэ верамзы кыдёке вуэм. Со доры валъёсын мукет интыосысь но юрттэт курыса вуылыны кутскиллям. Со ваньзэс учкыны, эмъяны тыршем. Вӧзаз санитарка луыса ужам сузэрез - Наталья Алексеевна Букина.

Мария фельдшерлэн улэм интыяз али ошмес бызе. Зэм, Арибашын та выллем ошмесъёс трос. Нош таиз ошмес тодазы вайытэ дуно эмчизэс. Со Мария Мыльниковалэсь нимзэ нуллэ угось. «Родник Маруси», «Маруся Чишмэсе» ошмеслы кыдёкын ик ӧвӧл Фидарис Сагадиевлэн юртэз. Толалтэ со семьяеныз Нефтекамскын улэ, нош тулыс сюлмыз вордскем гуртаз кыске. Анай-атай юртэз вӧзы пичи корка ӝутыса, отчы камин пуктыса, инкуазьлэн шулдыр сэрегаз, нюлэс вӧзын улон солы туж кельше.

Фидарис куке верам вылэм, Мария ошмесэз тупатоно шуыса. Верам кылзэ со 2021-тӥ арын быдэстӥз. Ужзы борды бускельёсыныз Алексей Гараевен, Сергей Младовен, Ханиф Фазлияхметовен ӵош кутскизы. Фидарислэн нылпиосыз Екатеринбургысь чебер изъёс ваизы. Соин гумыетӥ бызись вуэз котыртӥзы. Мукет кулэ кортъёс но солэн азбарысьтыз шедизы. Со сяна, гуртысьтызы ужбергатӥсьлы Георгий Гильмаутдиновлы вазиськизы. Гуртоосыз кыӵе ке ӟеч уж борды басьтӥсько ке, Георгий Васильевич ноку пумит уг кариськы, юрттэ. Ошмес тупатыны но со пиломатериал, профнастил но мукет кулэ материалъёс висъяз.

Котьку озьы луэ: кутскыны гинэ кулэ. Нош юрттэт кытысь вуоз, нырысь уд но тоды. «Тӥрлэсь шыд пӧзьтӥм», - шуэ ке но Алексей Гараев, шыдзы туж ӟеч пӧрмем. Ошмес дуре дугдӥсьёс соку ик тодазы ваёзы Мария Алексеевнаез, кудӥзлэн юрттэменыз со яке солэн ӵыжы-выжыосыз та дуннее вордскизы, кинлы ке но со тазалыксэ тупатыны юрттӥз.