Мынам эше - велосипед

Велосипедэн ветлонэз капчи, кышкыт ӧвӧл шуыса малпасьёс но вань, дыр. Сыӵе веран - шонертэм. Трос кужым поттон сяна, сюрес вылын ветлон правилоосты но тодоно, велосипедэн ветлӥсьёс шоры «кыкетӥ» сорт адямиос шоры кадь учкись но соин соослы сюрес сётытэк но луэ шуыса малпась машина кузёосты но чаклано, сюрес урдсы пезьдонэз но кема ӧвӧл.

Эстониын улыкум но ӵем велосипедэн ветлӥсько вал. Сое мон отысь ачим басьтӥ. Али Тарту карын велосипедъёсты прокатэн басьтон но вӧлмемын ни. Алигес отысь эшъёсы, велосипедэ пуксьыса, WhatsApp пыр виртуальной экскурсия но лэсьтӥзы.

Асьме дорысь велосипедистъёсты тросэн бадӟым городъёсысь пумитаны луэ ни. Куд-ог гуртъёсын, кылсярысь Куеда ёросысь Бадӟым Гондыр гуртын, озьы ик модае пыремын велосипедэн ветлон. Аслам адӟеме вань Удмуртиысь Алнаш ёросысь Писэйгурт но Улысь Сырьез гуртъёсысь калыклэсь ваче ог-огзы доры великен ветлэмзэс. Ас сярысьтым ке верано, ёрос центре, Вылысь Татышлае, велосипедэн ветлыны кутскыкум тросэз паймыса но учкылӥзы кадь шорам, чиньыен возьматэмзы но вань, угось нылпиосты сяна, великен ворттылӥсьёсты урамысь адӟыны дышемын ӧвӧл. Али вань ни мӧйыос пӧлын но ветлӥсьёс. Сюресъёсты но та транспортэн ветлӥсьёсты лыдэ басьтыса лэсьтыны кутскысалзы ке, гуртъёсын но котькудаз асфальт луысал ке, велосипедистъёс тросгес но тросгес луысалзы.