Башкириын спортэз азинтонлы бадӟым саклык висъяське

Программа кутэмын

Башкортостанын туэ спортэз но физической культураез азинтонъя кун программа кутэмын. Отчы пыртэмын массовой спорт, конной спортэз азинтон, валэн ветлыны дышетонъя школаос кылдытон, спортсменъёсты дасян но региональной проектъёсты – «Спорт – норма жизни», «Бизнес-спринт (Я выбираю спорт)», «Развитие спортивной инфраструктуры» - быдэстон.

Башкортостанын кык миллионлэсь трос адями спортэн азинлыко выре (республикаын улӥсьёслэн 58,2 процентэз). Араз регионын огъя 15,5 сюрс тематической спорт ужрадъёс ортчо: фестивальёс, спортлы сӥзем декадаос, универсиадаос но мукет. Отчы 800 сюрслэсь трос адями пыриське. 2022-тӥ арысен Башкортостанлэн тӧроезлэн кубокез понна вузъёс пӧлын спортлэн 30 видъёсызъя гужем но тол универсиадаос ортчо.

- Спорт, сое азинтон кун политикалэн одӥгез валтӥсь ӧрез луэ. Спорт ужрадъёсты дасян, ортчытон – валтӥсь ужпумъёс пӧлысь одӥгез, – вера БР-лэн тӧроез Радий Хабиров. – Башкортостанын спорт ужрадъёс арысь аре тросгес ортчо.

Нылпиос спортэн эшъясько

Республикаын спортлэн одӥгез валтӥсь ӧрез – детско-юношеской спортэз азинтон. Со 141 видъёсъя азинтӥське. Школаос но вуоно спортсменъёсты дасян сярысь сюлмасько. Нылпиосын спортэз гажась, ужзэс валась дышетӥсьёс ужало.

Татышлы ёросысь Вылысь Татышлыысь Финат Биктимиров но витьтон сюрслэсь ятыр ӧнеръёс пӧлысь аслыз физкультурая дышетӥсьлэсь ужзэ быръем. 1996-тӥ арын Чайковскийысь физкультурая кун институтэз йылумъяса диплом басьтэмез дырысен со Вылысь Татышлыысь Г. Сокорой нимо гимназиын ужа. Финат Миннигалиевичлэн вормонъёсыз 28 ар ӵоже трос люкаськемын. 2001-тӥ арын со «Отличник образования Республики Башкортостан» нимлы кузё луэм. 2017-тӥ арын физкультурая дышетӥсьлы РФ-ысь Дышетонъя но наукая министерстволэн Данъян грамотаез сётэмын, нош туэ сӥзьыл солэсь ужзэ Россия Федерациысь Просвещениея министерстволэн «Отличник просвещения» знакеныз дунъязы.

Физкультурая дышетӥсьлэн урокъёсаз пиналъёс шумпотыса пыро. Соос пӧлысь тросэз волейболъя, мини-лаптая кружокъёсы ветло. Финат Миннигалиевичлэн дышетэм нылпиосыз ӵошатсконъёсын усто быгатонлыкъёссэс возьмато. Таиз дышетскон ар но дышетӥсь понна ӟеч йылпумъяськиз. Берлось вормонзы -  школаын дышетскисьёслэн спартакиадазы улсын Краснохолмскийын ортчем мини-лаптаен шудонъя зональной ӵошатсконысь пиослэн командазы кыкетӥ интыен бертӥз (туспуктэм вылын).

– Физкультурая урокъёсты тунсыко ортчытон сярысь малпаськоно. Одӥгез урокед мӧзмыт луиз ке, дышетскисьёслэн уроке лыктэмзы уз поты ни. Соин урокын пӧртэм ужан амалъёсты кутоно. Нылпиос урокъёсад шумпотыса вуо ке, дышетӥсь понна со шумпотон луэ, нош дышетэм пиналэдлэн вормонэз – бадӟым кузьым, - вера Ф. Биктимиров.

Спорт объектъёс ӝутӥсько

Башкортостанын выль спорт объектъёс ӝутон ужъёс ӝог мыно. Та лыдпусъя республикамы Россиысь регионъёс пӧлын куинетӥ интыын луэ: Башкортостанэз азьпалто Москва но Москва улосвыл.

2023-тӥ арын республикаын ньыль бадӟым спорт центръёс, 12 ФОК-ёс, липето вить йӧ аренаос, кык бассейн осъёссэс усьтӥзы. 2024-тӥ арын 14 бадӟым спортобъект ӝутӥське.  

Фото: МБОУ Гимназия им. Гали Сокороя с.Верхние Татышлы