Куас сюрес огазеяз, задор мылкыд кузьмаз

Газетэ материал дасян муген Ренат Биктимировичен кык пол пумиськылоно луи. Вераськонмы пуштросо пӧрмылӥз. Р. Б. Галямшин улон сюресэз сярысь кема но тунсыко мадьылӥз, спортэз гажамез сярысь вератэк ӧз кельты.
- Вылысь Татышлыысь школае дышетскыны выжем бере, физкультураез Закир Лукманович Лукманов дышетӥз. Со нылпиос азе туж зол куронъёс пуктэ вал. Дуванысь сельхозтехникумысен зэмос спорт дуннее бадӟым вамыш лэсьтӥ. Мынам тренере - СССР-ысь физкультура удысысь сӥё-дано ужась Николай Емельянович Веремей - мынэсьтым спортэн эшъяськыны бугырскем мылкыдме ӝог валаз. Вань дырзэ со монэ кыдатонлы сӥзиз, шуыны луоз. Куасэн бызьылон сяна, капчи атлетикалы но саклык висъяй. Та ӧре монэ СССР-ысь спортъя мастер Валерьян Давлетович Хужин кыскиз. Башкир кун сельхозинститутысь агрономъёсты дасянъя факультетын дышетскыкум но куасэн бызьылонлэсь ӧй палэнскы. Тренереным, СССР-ысь физкультура удысысь сӥё-дано ужасен, Александр Адольфович Книссэн ми кытчы гинэ ӧм вуылэ: Красноярске, Минске, Мурманске, Свердловске, Ижевске, Перме, Болгарие, Чехословакие. СССР-ысь вузъёс пӧлын радъяськем ӵошатсконъёсы, ВЦСПС-лэн чемпионатъёсаз пыриськылӥм. Олимпиадаосын но дунне ӵошатсконъёсын чемпион нимлы кузё луэм спортсменъёсын но артэ бызьыны гожтӥз. Тыршеме юнме ӧз луы, 1973-тӥ арын мыным куасэн бызьылонъя СССР-ысь спортъя мастер ним сётӥзы. Ортчем аръёсы сюрес ке луысал, мон спортлы но тазалыкелы тросгес саклык висъясал, - ортчем аръёссэ син азяз пуктыса вералляз Ренат Биктимирович.
Солэн спортэз гажан мылкыдыз аръёс ортчыса но ӧз сӥя. Ялан малпаськыса улӥз егитъёсты, пиналъёсты та ӧре кыскон сярысь. Озьы аслаз кузьымез понна куасэн ӵошатсконъёс радъяз.

Шумпотымон, Ренат Биктимировичлэн кутскем ужез уг вуны, азьланьтӥське. Таяз ӵошатсконэ 160-лы матэ куасчиос пыриськизы. Соос, ӵошатсконэз учкыны лыктэмъёс Улысь Балтачысь культура юртын Ренат Биктимировичлы сӥзем выставкаен тодматскыны быгатӥзы. Улысь балтачъёс кунооссэс пӧсь чаен куноян сярысь но сюлмаськизы. Татын юрттэт возьматӥзы гурт поселенилэн администрациез но гурт хозяйство.
Спорт ужрадэз радъян сярысь сюлмаськемзы понна дано куасчилэн пиез Рустам Галямшин тау кылъёссэ вера Татышлы ёрос администрацилы, ёросысь Дышетонъя ёзэтлы, Егитъёслэн политиказыя но спортъя ёзэтлы, Улысь Балтач гурт поселенилэн администрациезлы, Башкортостанысь удмуртъёслэн НКЦ-зылы.«Атайме буре ваён ӵошатсконэз радъянэ кужымзэ понэм котькуд адямилы бадӟым тау», - ужрадэз усьтыса вераськыкуз шуиз Рустам Ренатович. Озьы ик ӵошатскисьёслы вормонъёс сӥзьыса вераськизы Татышлы ёрос администрациен кивалтӥсь Фанур Шайхисламов,  Улысь Балтач гурт поселенилэн администрациеныз кивалтӥсь Эдуард Рахимзянов,  Башкортостанысь удмуртъёслэн НКЦ-енызы кивалтӥсь Людвиг Зидымаков. Людвиг Латыпович НКЦ-лэн Тау карон гожтэтъёсыныз пусйиз Ф. Р. Шайхисламовез, А. У. Шайнуроваез, Э. Б. Рахимзяновез, Р. А. Бадертдиноваез, Р. Р. Галямшинэз, Р. В. Губаевез.