Вормон понна трос тыршоно

Бадӟым Гондырысь Спортъя юртлэн борддоръёсыз зэмзэ но трос спортменъёсты будэтӥзы ни. Нош 2019-тӥ арын «Лукойл» компанилэн юртын тупатӥськон ужъёс ортчытэмез бере тазалыко улонэн эшъяськисьёслэн лыдзы шӧдскымон йылӥз. Уго табере  татын волейболэн, ӝӧквыл теннисэн шудэм сяна, тренажёръёсын но мугорзэс кыдатыны быгато.  Спортъя юртын тазалыксы сярысь сюлмаськисьёс понна понна раздевалкаос, санузелъёс, душевой комнатаос вань. Озьыен, татын гурт калыклы паськыт луонлыкъёс кылдытэмын. 

- Нуназе школаын дышетскисьёслэн физкультурая урокъёссы но пӧртэм секциоссы ортчо, - вера Спортъя юртлэн директорез Раиф Ахматнурович Нуриев. – Нош ӝытазе бадӟымъёс люкасько. Татын спортлэн пӧртэм видъёсызъя ӵошатсконъёс ортчыло. Спортъя юртын ноку мӧзмыт уг луы.

Раиф Ахматнуровичлэн кылъёсызъя, Бадӟым Гондырын волейболэн, футболэн, ӝӧквыл теннисэн шудӥсьёс, куасэн бызьылӥсьёс, капчи атлетикаен эшъяськисьёс трос. Директор, кылсярысь, Алёна но Алеся Нургалиеваослэн вормонъёссы сярысь дугдытэк мадьыны быгатысал. Вераны кулэ, соослэн анай-атайзы но тазалыко улонэн эшъясько, куасэн ветло, бызьыло. Куасэн бызьылонын кужмоос пӧлын луо Александр Мухаметзянов, Антон Ракимов, Венера Габдуллина. Соос Пермь шаерын ортчись пӧртэм ӵошатсконъёсы пыриськылӥзы ни. «Студентъёсын котьку ӟеч кусыпъёс возиськом. Соос ӵошатсконъёсы но бертыло, мукет ласянь но юрттэт возьматыны тыршо. Волейболъя ӵошатсконъёсы но егитъёс мыло-кыдо пыриськыло. Туэ БР-ысь удмуртъёслэн НКЦ-зылэн кубокез понна волейболъя ӵошатсконын пиос но, нылъёс но кубок басьтӥзы», - вера со. Нош Руслан Менгалиев, кылсярысь, мини-футболын одӥгез кужмоез луэ. Со Краснокамскысь команда понна шудэ, азьвыл Куедаысь «Факел» командалэсь но данзэ утьылӥз. Бадӟым Гондырысь футбол команда пыр потэм Евгений Меншараев Пермьын дышетскыкуз но спортэн уг люкиськы, отысь команда понна шудэ. «Гуртэ берто ке, соос котьку спортъя центре вуыло. Пиосын мон витетӥ классын дышетскыкузы ужаны кутски», - шуэ Раиф Ахматнурович. Вераны кулэ, Р. А. Нуриев ачиз но футболэн шудэм. «1980-тӥ аръёсы мон ёрослэн футболъя командаезлэн капитанэз но тренерез вал», - ортчем аръёсты тодаз вае со. Тренерлэн туала пиналъёсыз но мини-футболэн ӵошатсконъёсын басьтэм вормонъёссы сярысь трос вераны быгато ни. Соос пӧлысь котькудзы, анай-атайёссы но (соос нылпиоссылы ӵошатсконъёсы вуылыны юртто), ӟеч тодо, спортын вормонъёс басьтон понна трос пӧсяно, тыршоно шуыса.