+1 °С
Лымы
Антитеррор
Вань иворъёс
Спорт
27 апрель 2022, 13:55

«Ваньмон дырзэс спортлы, ӟеч ужъёслы мед сӥзёзы»

Улысь Балтач гурт трос дано адямиосты будэтӥз. Соос пӧртэм удысъёсын адӟем карымон луо. Татын ик вордӥськыса будэмын боксъя СССР-ысь спортъя мастер Евгений Шайсламов. Та нимзэ со сӥзьыл 1989-тӥ арын утэм.

«Ваньмон дырзэс спортлы, ӟеч ужъёслы мед сӥзёзы»
«Ваньмон дырзэс спортлы, ӟеч ужъёслы мед сӥзёзы»

Евгений Нигаматзянович Свердловск улосвылысь Серовын улэ, тылпулэсь утиськонъя удысын тырше. Боксэз быръем пумысен со вера:

- 1976-тӥ арын Бигинейысь шор ёзо школаез йылпумъяй. 1977-тӥ арын монэ армие басьтӥзы. Отын тросэз эшъёсы боксёръёс вал. Мон но боксэн тунсыкъяськыны кутски. Малпай, спортлэн та видэз мыным улонын юрттоз, монэ кужмогес кароз шуыса.

Служба аръёсыз бере Е. Шайсламов Свердловскысь Уральской политехнической институтэ дышетскыны пырем. Отын со боксъя занятиосы но ветлэм. «УПИ-е дышетскыны пыри но бӧрысь Уральской лесотехнической институтэ дышетскыны выжи», - вера Е. Шайсламов. Отын но боксъя тренировкаоссэ азинтэм. Спортъя мастер тренеръёсыз В. Ю. Ким, С. Н. Селеванов, Ю. А. Врублёвский сярысь трос шуныт кылъёс вера. Соослэн сётэм тодон-валанзы, визь-кенешъёссы Евгений Нигаматзяновичлы Омскысь физкультурной университетын дышетскыкуз но юрттӥллям.  

- Тренировкаосын люкам тодон-валанды, быгатонлыкъёсты, ӵошатсконъёсын сяна, улонады огпол ке но кулэ луизы-а? – юасько Евгений Нигаматзяновичлэсь.

- Общежитиын улыку пӧртэм дыръёс луизы. Куддыр боксёрской приёмъёсты но возьматъятэк уг луы вал, - шуэ Е. Шайсламов.

Спортъя мастер куасэн но ӵем ветлэ
Спортъя мастер куасэн но ӵем ветлэ

Евгений Нигаматзяновичлэн егит дыръяз быръем тунсыкъяськонэз али но сюлэмызлы матын. Ваньмон дырзэ со спортлы сӥзе. Семьяез но спортэн эшъяське. «Кузпалы тренажёрной залэ ветлэ, нылмы - вуын уяны», - вера Е. Шайсламов.  

Евгений Нигаматзянович вордскем палъёсызлэсь палэнын ке но улэ, гуртоосызлэн улонэнызы тунсыкъяське. Улысь Балтач гуртлэн «Трезвое село» республика конкурслэн муниципал этапаз вормисе потэмезлы со туж шумпотэ.  

- Тазалыко улонэн герӟаськем конкурсъёсын улысь балтачъёслы вормон сӥзисько, - вера со. – Гурт калык спорт ужрадъёсы мыло-кыдо мед пыриськоз. Адямиос ӟечезлы осконзэс медаз ыштэ. Ваньмон дырзэс спортлы, ӟеч ужъёслы мед сӥзёзы. Юонэн медаз эшъяське. Сазь но таза мед луозы.  

Автор:Миляуша Булатова
Читайте нас: