Шутэтскон нуналъёсы трос пӧртэм ужрадъёс ортчизы

Ильгиз Рахимзянов, Алексей Назьмиев, Евгений Лукманов, Рустам Каштиев, кылсярысь, зэмос пиосмуртъёслэн фестивалязы вуылӥзы. Фестиваль шаермес утёнлэсь данзэ ӝутон, егитъёс пӧлы тазалыко улонэн эшъяськонэз вӧлмытон, наркотиклэсь уродзэ валэктон вылысь радъяськиз. Пиос военно-исторической, «Воинские звания» викторинаын но мукет пӧртэм конкурсъёсын кужымзэс эскеризы.

Вуж Варашын куасэн ӵошатсконъёс радъяськизы. Тазалыклэн но шумпотыса кема улонлэн арзылы, Шаермес утисьёслэн нуналзы сӥзем ужрадэ пичиос но, бадӟымъёс но шумпотыса пыриськизы. Куас сюрес вылэ султӥсьёс пӧлын тужгес пичиез луиз ньыль аресъем Родион Насибуллин, тужгес бадӟымъёсыз – Елена Нариманова но Касимьян Милитдинов.

Эстафетаын ньыль команда стартэ султӥз. Соос пӧлысь финише нырысетӥен вуиз Вуж Варашысь команда, кыкетӥен – будья варашъёс, куинетӥен – выль варашъёс, ньылетӥен – гурт поселенилэн администрациезлэн командаез.

22-тӥ феврале тунсыко ужрад ортчиз Нанядыын. Татын пиос футболэн шудӥзы. Отын куинь командаос кужымзэс эскеризы. Нош соосты пӧсь чаен кунояны дасяськизы гуртысь «Инвожо» ансамбле ветлӥсьёс. Футболэн шудӥсьёсты кезьыт куазь но ӧз кышкаты.

Та нуналэ ик варашъёслэн одӥгез бадӟым ӵошатсконзы Янаулын ортчиз. Соос республикаысьтымы удмуртъёслэн национально-культурной центрзылэн кубокез понна волейболэн ӵошатскон радъязы. Отчы пиослэн куать командаоссы вуизы, нылъёслэн – кык.

Ӵошатсконэз ортчытонын коньдонэн герӟаськем ужпумъёсты ас вылазы басьтӥзы Вуж Вараш гурт поселенилэн администрациез, «Колхоз Восток» СПК, Вуж Варашысь Галиакберовъёслэн семьязы. Нош командаосты люкан но шудонэз радъян бордын тыршиз Леонид Набиев.

(Пыр-почгес лыдӟыны быгатоды газетмылэн вуоно номерысьтыз).